გაბრიელ კამოევი

დაბადების ადგილი: ბათუმის ოლქი.

დაამთავრა მოსკოვის სამხედრო-საარტილერიო სკოლა I თანრიგით 1931 წელს; ფიზიკური კულტურის სახელმწიფო ცენტრალური ინსსტიტუტის სამხედრო ფაკულტეტი 1934 წელს; ფრუნზეს სახელობის სამხედრო აკადემიის ფაკულტეტი 1950 წელს.

1926 წლის ოქტომბერში, ნამდვილი სამხედრო სამსახურის დამთავრებისთანავე, დარჩა ჯარში ზემსახურად; 1931 წელს, სკოლის დამთავრების შემდეგ, დაინიშნა 74-ე საარტილერიო პოლკის ოცმეთაურად; 1934 წელს, ინსტიტუტის დამთავრების შემდეგ, დანიშნეს ჩრდილო-კავკასიის სამხედრო ოლქის, ტამანის 74-ე მსროლელი დივიზიის ფიზიკური მომზადების ინსტრუქტორად; 1938 წელს დანიშნეს საარტილერიო დივიზიონის მეთაურად, შემდეგ - 182-ე საარტილერიო პოლკის შტაბის უფროსად; აქტიურად მონაწილეობდა მეორე მსოფლიო ომში; 1941-1943წწ. იყო 22-ე მსროლელი დივიზიის 157-ე საარტილერიო პოლკის მეთაური; ომის უკანასკნელი დღეები მსროლელი დივიზიის არტილერიის სარდლის თანამდებობაზე გაატარა; 1947 წელს მიენიჭა პოლკოვნიკის სამხედრო წოდება და დანიშნეს შენაერთის არტილერიის სარდლად; 1955 წელს დაინიშნა სამხედრო ოლქის არტილერიის შტაბის უფროსად; 1958-1960წწ. მსახურობდა სამხედრო ოლქის სარაკეტო ჯარების და არტილერიის სარდლად; საბრძოლო დამსახურებისთვის დაჯილდოებული იყო ორდენებით და მედლებით. არტილერიის გენერალ-მაიორი (1958).

წყარო: სომხეთის სამხედრო ელიტა: (სომეხი გენერლები საქართველოდან): ბიოგრაფიული ცნობარი, გოგიტიძე, მამუკა. -თბ., 2014.-გვ.151-152