ლია ბაშელეიშვილი

დაბადების ადგილი: ქ. ბათუმი.

დაამთავრა თბილისის სახელმწიფო უნივერსიტეტის ფილოლოგიის ფაკულტეტი 1985 წელს; ასპირანტურა 1990 წელს.

1978-1980წწ. იყო ბათუმის რადიოსა და ტელევიზიის კორესპონდენტი; 1985-1987წწ. ცხინვალის კ. ხეთაგუროვის სახელობის სახელმწიფო პედაგოგიური ინსტიტუტის ქართული ენის კათედრის უფროსი მასწავლებელი; 1993-2001წწ. ქ. მოსკოვის რუსულ-ქართული გიმნაზიის ქართული ენისა და ლიტერატურის მასწავლებელი; 2001-2003წწ. ჟურნალ "მნათობის" საკუთარი კორესპონდენტი მოსკოვში; 2003-2023წწ. მოსკოვის მ. ლომონოსოვის სახელობის სახელმწიფო უნივერსიტეტის აზიისა და აფრიკის ინსტიტუტის ირანული ფილოლოგიისა და ისტორიის ფაკულტეტის დოცენტი; 2023 წლიდან თბილისის სახელმწიფო უნივერსიტეტის შოთა რუსთაველის სახელობის ქართული ლიტერატურის ინსტიტუტის მეცნიერ თანამშრომელი. მისი სამეცნიერო ინტერესთა სფერო ძირითადად მოიცავს ქრისტიანული ლიტერატურის საკითხებს; იკვლევს ასკეტურ-მისტიკურ ტოპოსთა გენეზისს, მიმართავს ბიბლიოლოგიურ, ეგზეგეტიკურ, ასკეტიკურ და მისტიკურ ლიტერატურას აგიოგრაფიული ტოპოსების  წარმომავლობის დასადგენად, მონასტრული კონსტიტუციებისა და  წესების შესასწავლად; შეისწავლა რემარკების როლი და ფუნქცია ოშკისა და მცხეთის ბიბლიაში, სათაურის თარგმნის პრობლემა და მისი პირველწყაროები; გამოქვეყნებული აქვს (რუსულ ენაზე) რუსთველოგიური მიმართულების სტატიებიც, რომლებშიც განხილულია მეგატექსტის ის მოდიფიცირებული კონტექსტები, რომლებიც სპარსულ და არაბულ ლიტერატურაშიც გვხდება; წლების განმავლობაში თანამშრომლობდა რუსეთის დიდ ენციკლოპედიასთან - არის ავტორი ან თანაავტორი სტატიებისა: "საქართველო", "ქართული ფოლკლორი", "ქართული ლიტერატურა"; აგრეთვე, პერსონალიების (ქართვ. მწერლების, პოეტების, საზოგადო მოღვაწეების) შესახებ მომზადებული საენციკლოპედიო პუბლიკაციებისა. ფილოლოგიის დოქტორი (2001).

წყარო: თბილისის სახელმწიფო უნივერსიტეტი: encyclopedia.tsu.ge

• მონასტრული ცხოვრების პრინციპები ქართულ ჰაგიოგრაფიაში : მონოგრაფია (ავტორი). - თბილისი, სამშობლო, 2001. - 203გვ. - ISBN: 9992826975