ქეთევან აბესაძე

დაბადების ადგილი: სოფელი ზოვრეთი, ქუთაისის გუბერნია.

დაამთავრა თბილისის სახელმწიფო უნივერსიტეტის საბუნებისმეტყველო ფაკულტეტი მცენარეთა ანატომია-ფიზიოლოგიის განხრით.

უნივერსიტეტის დამთავრებამდე მუშაობა დაიწყო თბილისის ბოტანიკური ბაღის ფიზიოლოგიის ლაბორატორიაში. ვასილ ალექსანდროვის ხელმძღვანელობით გამოაქვეყნა სტატიები საკავშირო და საერთაშორისო ჟურნალებში: "საცრისებრი მილების გვერდითი კედლების სტრუქტურა" (1926), "ასიმილაციური და ტრანსპირაციული პროცესები ყურძნის ძირითად კახურ ჯიშებში" (1929), ვასილ ალექსანდროვის თბილისიდან გამგზავრების შემდეგ (1927) გააგრძელა სამეცნიერო თანამშრომლობა თავის მასწავლებელთან; 1932 წელს ვ. ალექსანდროვი, ქ. აბესაძე, რ. ნასონოვი და მ. იაკოვლევი აქვეყნებენ სტატიას "ზოგიერთ ბალახოვან (ლაფან-ბოჭკოვან) მცენარეებში ღეროს აგებულების პრინციპები და მისი შესწავლის მეთოდები", ვ. ალექსანდროვისა და ქ. აბესაძის ავტორობით რუსულ და გერმანულ სამეცნიერო ჟურნალებში დაიბეჭდა ნაშრომი: "მასალები ორლებნიანი მცენარეების ჭურჭელ-ბოჭკოვან კონაში ჭურჭლების წარმოშობის განმსაზღვრელ კანონზომიერებათა გამოსავლენად" (1934), მათი ერთობლივი ნამუშევარია საკავშირო ბოტანიკურ ჟურნალში გამოქვეყნებული სტატია "Об образовании листовой щели в центральном цилиндре стебля двудольного растения" (1935); 1919-1927წწ. საქართველოს სახელმწიფო უნივერსიტეტთან დაარსდა მცენარეთა ფიზიოლოგიის კათედრა, ქეთევან აბესაძე თავდაპირველად პრეპარატორად (1926), შემდგომში კი ასისტენტად (1929) ჩაირიცხა უნივერსიტეტის შტატში; ბოტანიკური ბაღის შრომების კრებულში სხვებთან ერთად გამოაქვეყნა სტატია "საქართველოში გავრცელებული ვაზის ჯიშების ფილოქსერისადმი გამძლეობის სხვადასხვა ხარისხის დამოკიდებულება მათი ფესვთა სისტემის ანატომიურ აგებულებასთან" (1930); კვლევის შედეგები საფუძვლად დაედო ფილოქსერაგამძლე ვაზის ჯიშების გამოყვანას; 1931 წელს კვალიფიკაციის ასამაღლებლად მივლინებულ იქნა ლენინგრადის საკავშირო მემცენარეობის ინსტიტუტში; 1933 წელს იბეჭდება ქეთევან აბესაძისა და ქსენია ცხაკაიას ნაშრომი – "სანამყენისა და საძირის ურთიერთგავლენა ცაგახსნილ და ცაგაუხსნელ ვაზის ნამყენებში წყლის მარაგის განაწილებაზე", 1950 წელს ქ. აბესაძე, ლ. ჯაფარიძე და მ. შანიძე აქვეყნებენ თეზისებს - "ქლოროზით გამოწვეული ცვლილებები დამყნილი ვაზის ჯიშის "ალიგოტე"-ს გამტარ სისტემაში"; 1940 წლის თებერვალში მან მონაწილეობა მიიღო მცენარეთა ფიზიოლოგების საკავშირო კონფერენციის მუშაობაში; გარდა კვლევითი მუშაობისა, სხვადასხვა დროს ეწეოდა პედაგოგიურ მუშაობას; ასწავლიდა თბილისის სასოფლო-სამეურნეო, ოზურგეთის საკავშირო ჩაის ინსტიტუტში, თბილისის ზოოვეტერინარულ, ქუთაისის პედაგოგიურ ინსტიტუტში, თბილისის სახელმწიფო უნივერსიტეტში; 1937-1950წწ. მუშაობდა თბილისის პედაგოგიურ ინსტიტუტში ბოტანიკის კათედრის გამგედ; 1938 წლიდან თბილისის სახელმწიფო უნივერსიტეტში კითხულობდა ლექციებს მცენარეთა ანატომიაში; 1950 წელს ჯანმრთელობის მდგომარეობის გამო განთავისუფლდა ბოტანიკის კათედრის გამგის მოვალეობისაგან და გამოეცხადა მადლობა ინსტიტუტში ხანგრძლივი და ნაყოფიერი მუშაობისათვის. 

წყარო: საქართველოს პირველი ბოტანიკოს-ანატომები  = The first botanist-anatomists of Georgia/ინფორმაცია დაამუშავა ნანა (ევა) ჩხუბიანიშვილმა, რედაქტორი შალვა სიხარულიძე.-თბ.,2016.-გვ.20-26