ზაზა უშვერიძე

დაბადების ადგილი: ქ. თბილისი.

დაამთავრა თბილისის სახელმწიფო სამედიცინო ინსტიტუტის სამკურნალო ფაკულტეტი 1964 წელს.

1964-1966წწ. იყო ქ. დუშეთის სასწრაფო სამედიცინო დახმარების სადგურის ექიმი-თერაპევტი; 1966-1967წწ. ქ. თბილისის სასწრაფო სამედიცინო დახმარების სადგურის ექიმი-თერაპევტი; 1967-1973წწ. საქართველოს ჯანმრთელობის სამინისტროს ექსპერიმენტული და კლინიკური ქირურგიის სამეცნიერო-კვლევითი ინსტიტუტის პათოლოგიური ფიზიოლოგიის განყოფილების ჯერ უმცროსი, შემდეგ უფროსი მეცნიერ-თანამშრომელი; კურორტ შოვისა და უწერას ექიმ-თერაპევტი (1973-1977, პარალელურად და სეზონურად); 1978-1982წწ. ქ. თბილისის V კლინიკური საავადმყოფოს II თერაპიული განყოფილების ექიმი-თერაპევტი; უფროსი მეცნიერ-თანამშრომელი (1978); 1982-1993წწ. თბილისის სახელმწიფო სამედიცინო ინსტიტუტის სამკურნალო ფაკულტეტის შინაგან სნეულებათა კათედრის ასისტენტი; 1995-2002წწ. დოცენტი; ავტორია 32 სამეცნიერო ნაშრომის და სასწავლო-მეთოდური რეკომენდაციის; მისი სასწავლო-მეთოდური სახელმძღვანელოები, დამტკიცებულია თბილისის სახელმწიფო სამედიცინო ინსტიტუტის სასწავლო-მეთოდური საბჭოს მიერ: "კუჭისა და თორმეტგოჯა ნაწლავის წყლულოვანი დაავადებების დიაგნოსტიკა" (1998) და "ჰიპერტონული დაავადებების დიაგნოსტიკა" (1999); მისმა ნაშრომმა "მარხვის ზეგავლენის შესახებ ზოგიერთი დაავადების მიმდინარეობაზე" დიდი გამოხმაურება ჰპოვა; სისტემატურად ატარებდა პრაქტიკულ მეცადინეობებს სტუდენტებთან. აქტიური მონაწილე იყო სტუდენტთა სამეცნიერო წრისა და სასწავლო-კვლევითი მუშაობის, მისი ხელმძღვანელობით მომზადდა რამდენიმე სამეცნიერო და სასწავლო კვლევითი ნაშრომი; 1998 წელს კათედრის მიერ წარდგენილი იყო წლის საუკეთესო პედაგოგად; მონაწილეობას ღებულობდა სწავლების ავტომატიზებული სისტემის შექმნაში ინფორმატიკისა და ჯანმრთელობის დაცვის კომპლექსური ავტომატიზაციის სამეცნიერო-კვლევით ინსტიტუტთან ერთად; იყო I კლინიკური საავადმყოფოს I ქირურგიული განყოფილებისა და მე-10 პოლიკლინიკის კონსულტანტი; იყო ქ. თბილისის თერაპიულ, პათოფიზიოლოგთა, გერონტოლოგთა და გერიატრთა სამეცნიერო საზოგადოებების წევრი; დაჯილდოებული იყო რამდენიმე საიუბილეო მედლით. ექიმი-თერაპევტი, მედიცინის მეცნიერებათა კანდიდატი.

საკანდიდატო დისერტაციის თემა - "ზოგიერთი ფიზიოლოგიური და პათოფიზიოლოგიური ძვრების მძიმე ტრავმული შოკისა და სისხლის მწვავე დაკარგვის ჰიპერბარული ოქსიგენოთერაპიის დროს", დაიცვა 1972 წელს.

წყარო: საქართველოს სამედიცინო კალენდარი, 2006 წელი / ჯუმბერ ქორჩილავა .-თბ.,2006.-გვ.665-669