აბელ მაყაშვილი

დაამთავრა ელისავეტგრადის სამხედრო პროგიმნაზია 1877 წელს, ყაზანის ქვეითი უნკერთა სასწავლებელი 1880 წელს და ოფიცერთა მსროლელი სკოლა.

ჯარში მსახურობდა 1877 წლიდან. 1880 წლიდან მსახურობდა 164-ე ზაქათალას ქვეით პოლკში. მეთაურობდა ასეულს და ბატალიონს. 1909 -1914 წლებში მსახურობდა პოდპოლკოვნიკად 185-ე ბაშკადიკლარის სარეზერვო ბატალიონის მეთაურის თანაშემწედ, შემდეგ მეთაურად. 1910 წლის 6 დეკემბერს მიენიჭა პოლკოვნიკის სამხედრო წოდება. 1914 წლის 25 ივნისს დაინიშნა გორის 202-ე ქვეითი პოლკის მეთაურის დროებით მოვალეობის შემსრულებლად. მონაწილეობდა (1914-1918) წლების პირველ მსოფლიო ომში. 1914-1917 წლებში მეთაურობდა მე-16 გრენადერთა მინგრელსკის პოლკს. 1917 წლის 26 აპრილიდან მეთაურობდა კავკასიის გრენადერთა დივიზიის 1-ლ ბრიგადას. 1917 წლის რუსეთში ოქტომბრის რევოლუციის შემდეგ გავიდა თადარიგში და ცხოვრობდა ტფილისში. 1918 – 1919 წლებში მსახურობდა ქართულ ჯარში. იყო ახალციხის გენერალ-გუბერნატორი და ტფილისის სამხედრო კომენდანტი. 1919-1920 წლებში მსახურობდა აზერბაიჯანის ჯარში, მე-2 ქვეითი დივიზიის უფროსის თანაშემწედ. აზერბაიჯანის დემოკრატიული რესპუბლიკის სამხედრო მინისტრის, არტილერიის გენერლის სამედ-ბეი მეხმანდაროვის (1855-1931) ბრძანებით, გენერალ-მაიორი მაყაშვილი მიღებულ იქნა სამხედრო სამსახურში და დაინიშნა ჯერ 1-ი ქვეითი დივიზიის უფროსის თანაშემწედ (ხანკენდის გარნიზონის უფროსის მოვალეობის უფლებების შესრულებით), ხოლო მოგვიანებით მე-2 ქვეითი დივიზიის უფროსის თანაშემწედ. 1920 წლის მარტში დაინიშნა განჯის გამაგრებული რაიონის უფროსად და განჯის სამხედრო სკოლის უფროსად. დაიღუპა აზერბაიჯანში საბჭოთა ხელისუფლების დამყარების დროს. (ერთი ვერსიით მას ხელ-ფეხი შეუკრეს და გადააგდეს კასპიის ზღვაში) წითლების მიერ ბაქოს აღების შემდეგ. რუსეთის არმიის გენერალი, საქართველოს ეროვნული არმიის ერთერთი მშენებელი.

წყარო: თბილისი: ენციკლოპედია.- თბ., 2002. - გვ.647; სამხედრო ფიცის ერთგულნი: ქართველი გენერლები.-თბ., 2015.-გვ.74

• 1917 - წმინდა სტანისლავის I ხარისხის ორდენი (მახვილებით)
• 1910 - წმინდა ვლადიმირის IV ხარისხის ორდენი
• 1906 - წმინდა ანას II ხარისხის ორდენი
• 1899 - წმინდა სტანისლავის II ხარისხის ორდენი
• წმინდა ვლადიმირის III ხარისხის ორდენი