პეტრე სურგულაძე

დაბადების ადგილი: სოფელი ჩიბათი, ოზურგეთის მაზრა.

დაამთავრა თბილისის ალექსანდრეს სახელობის საოსტატო ინსტიტუტი 1894 წელს.

იყო ქუთაისის სათავადაზნაური პროგიმნაზიის გამგე–მასწავლებელი, შემდეგ თბილისის კერძო გიმნაზიაში ასწავლიდა ისტორიას. ახლო ურთიერთობა ჰქონდა იაკობ გოგებაშვილთან. ეწეოდა ჟურნალისტურ საქმიანობას. 1909-1919წწ. ჟურნალ "ერის", 1913-1914წწ. კი ჟურნალ "თავისუფალი საქართველოს" რედაქტორი იყო. დიდი წვლილი მიუძღვის ჟენევაში "საქართველოს დამოუკიდებლობის კომიტეტის" შექმნაში, ეროვნულ–დემოკრატიული პარტიის ჩამოყალიბებაში. მონაწილეობდა საქართველოს ეროვნული ყრილობის მუშაობაში (1917 წლის 19 ნოემბერი), დამოუკიდებლობის აქტის შედგენაში. ნაშრომები აქვს საქართველოს დამოუკიდებლობის საერთაშორისო აღიარების, ქართული ენისა და მწერლობის, ასევე სხვა მრავალი ეროვნული პრობლემის შესახებ. საქართველოს დემოკრატიული რესპუბლიკის არსებობის წლებში (1918-1921წწ.) ასრულებდა დიპლომატიურ მისიას როგორც საერთაშორისო მოლაპარაკებებში, ასევე ქვეყნის შიგნით არსებული რთული პოლიტიკური ვითარების მოწესრიგების მიზნით. მონაწილეობდა მესხეთის, აჭარის, საინგილოს პრობლემების მოგვარებაში. რუსეთის მიერ საქართველოს ოკუპაციის შემდეგ, 1921 წლიდან ემიგრაციაში იყო; 10 წელი ცხოვრობდა სტამბოლში და იქვე გარდაიცვალა.

• საქართველოს დამფუძნებელი კრება, წევრი
• საქართველოს ეროვნული საბჭო, წევრი

• საქართველო როგორც დამოუკიდებელი სახელმწიფო (ავტორი). - სტამბოლი, ქართველთა ეროვნულ კომიტეტის გამოცემა N 21, 1918. - 24გვ.
• დამოუკიდებელ საქართველოს საერთაშორისო მნიშვნელობა (ავტორი). - სტამბოლი, ქართველთა ეროვნულ კომიტეტის გამოცემა N 3, 1918. - 16გვ.
• საქართველო თავისუფლებისაკენ (ავტორი). - სტამბოლი, ქართველთა ეროვნულ კომიტეტის გამოცემა, N 1, 1917. - 22გვ.
• ეროვნული ენა (ავტორი). - ტფილისი, ამხ. "ცისკარი"-ს გამოცემა N 2, 1905. - 79გვ.
• დაწყებითი განათლება (ავტორი). - ტფილისი, გამოც. "ნაკადულის" რედაქციისა N 1, 1905. - 46გვ.