ვალერიან ზურაბიშვილი

დაბადების ადგილი: სოფელი შემოქმედი, ახლანდელი ოზურგეთის მუნიციპალიტეტი.

დაამთავრა თბილისის სახელმწიფო უნივერსიტეტის ეკონომიკის ფაკულტეტი 1939 წელს.

1947–1986 წლებში მუშაობდა სსრკ-ის სახელმწიფო კონტროლის სამინისტრო სისტემაში და საქართველოს ფინანსთა სამინისტროს ცენტრალურ აპარატში სხვადასხვა პასუხსაგებ თანამდებობაზე. ეწეოდა სამეცნიერო-პედაგოგიურ საქმიანობას თბილისის სახელმწიფო უნივერსიტეტის (1961–1986), საქართველოს მეცნიერებისა და ტექნიკის სახელმწიფო კომიტეტთან არსებულ სახალხო მეურნეობის მართვის ინსტიტუტში (1986–1991), ფინანსებისა და სტატისტიკის ინსტიტუტში (1991–1994). 1994–2003 წლებში იყო ეკონომიკისა და სოციალური პრობლემების სამეცნიერო-კვლევითი ინსტიტუტის ფინანსების, ფულის მიმოქცევისა და კრედიტის განყიფილების გამგე, 2004–2006 წლებში ამავე ინსტიტუტის მთავარი მეცნიერ თანამშრომელი. არის მრავალი სამეცნიერო შრომის ავტორი. მისი კვლევის საგანი იყო ფინანსების და სამეურნეო საქმიანობის ეკონომიკური ანალიზის საკითხები. აღსანიშნავია ვალერიან ზურაბიშვილის ღვაწლი ეკონომიკური და საფინანსო-საკრედიტო ტერმინოლოგიის შემუშავებაში. გამოცემული აქვს მონოგრაფიები და სახელმძღვანელოები. მონაწილეობდა II მსოფლიო ომში. მიღებული აქვს საბრძოლო და სახელმწიფო ჯილდოები. ეკონომიკის მეცნიერებათა დოქტორი (1994), პროფესორი (1996).

წყარო: საქართველო: ენციკლოპედია: ტ.III.–თბ., 2014.-გვ.402; წიგნი ღირსებისა: ტ. 3/ შემდგ.: თამაზ ყიფიანი (რედ.), თენგიზ გაჩეჩილაძე, გურამ სიმონიშვილი.- თბ., 2001. - გვ.56;  ომგადახდილი მეცნიერები : საგამომცემლო ცნობები. კრებული / შემდგ.: გრიგოლ ბრეგაძე. - თბ., 2000. გვ. 45

• თბილისის სახალხო დეპუტატთა საქალაქო საბჭო , დეპუტატი (1977-1987)

• 1998 - ღირსების ორდენი
  საქართველოში ეკონომიკური მეცნიერების განვითარებისა და მაღალი კვალიფიკაციის სპეციალისტთა აღზრდის საქმეში შეტანილი დიდი წვლილისათვის
• 1967 - საქართველოს რესპუბლიკის დამსახურებული ეკონომისტი
• მედალი "გერმანიაზე გამარჯვებისთვის"
• შრომის ვეტერანი
• მედალი "შრომითი მამაცობისთვის"
• "წითელი ვარსკვლავის" ორდენი
• სამამულო ომის II ხარისხის ორდენი
• მედალი "საბრძოლო დამსახურებისთვის"

• რუსულ-ქართული საფინანსო-საკრედიტო ლექსიკონი (ავტორი). - თბილისი, მეცნიერება, 1993. - 97გვ.
• მშენებლობის ეკონომიკური ანალიზი (ავტორი). - თბილისი, თბილ. უნ-ტის გამ-ბა, 1990. - 96გვ.
• საფინანსო ბერკეტების სრულყოფა მეურნეობრიობის ახალ პირობებში სამშენებლო ნაწარმების ეფექტიანობის ასამაღლებლად (ავტორი). - თბილისი, საბჭ.საქართველო, 1989. - 31გვ.
• მშენებლობის ეკონომიკური ანალიზი : პრაქტიკულ-მეთოდ. სახელმძღვ. (ავტორი). - თბილისი, მეცნიერება, 1980. - 151გვ.