გივი კაპანაძე

დაბადების ადგილი: ქ. ჭიათურა.

დაამთავრა საქართველოს პოლიტექნიკური ინსტიტუტის სამშენებლო ფაკულტეტი სამრეწველო და სამოქალაქო მშენებლობის სპეციალობით 1953 წელს.

მუშაობა დაიწყო მშენებლობის სამინისტროს სამშენებლო ტრესტ "საქშახტმშენის" სამშენებლო სამმართველო "ჭიათურშახტმშენის" ინჟინრად; 1956-1958წწ. პარტიულ სამუშაოზეა საქართველოს კპ ჭიათურის საქალაქო კომიტეტში; 1958 წელს დაინიშნა საქართველოს მშენებლობის სამინისტროს N8 სამშენებლო ტრესტ "ჭიათურმშენის" სამშენებლო სამმართველოს მთავარ ინჟინრად, ხოლო 1962 წელს სამმართველოს უფროსად, ჭიათურის საშენ მასალათა კომბინატის დირექტორად (1967-1973); 1973-1975წწ. მუშაობდა თბილისის სამშენებლო ტრესტ "ინჟმშენის" N5 სამშენებლო სამმართველოს უფროსად, ხოლო 1975 წლიდან ლითონკონსტრუქციების სამმართველოს უფროსად; მისი უშუალო მონაწილეობითა და ხელმძღვანელობით აშენდა ჭიათურაში N1 საშუალო სკოლა, საფეხბურთო სტადიონი, კულტურის სახლი და ცენტრალური უნივერმაღი, საჩხერეში კი ბამბეულის კომბინატი, საავადმყოფო და მეფრინველეობის ფაბრიკა; მიღებული აქვს სახელმწიფო ჯილდოები და მედლები.

წყარო: საქართველოს არქიტექტორთა და მშენებელთა ენციკლოპედია. -თბ., 2017.-გვ.278-279