შოთა მამულაძე

დაბადების ადგილი: სოფელი ნენია, შუახევის რაიონი.

დაამთავრა ბათუმის შოთა რუსთაველის სახელობის პედაგოგიური ინსტიტუტი ისტორია-ქართული ენა და ლიტერატურის სპეციალობით 1975 წელს; 1978-1981 წლებში სწავლობდა ივ. ჯავახიშვილის სახელობის ისტორიის, არქეოლოგიისა და ეთნოლოგიის ინსტიტუტის ასპირანტურაში არქეოლოგიის სპეციალობით.

1975-1980წწ. მუშაობდა ბათუმის სახელმწიფო პედაგოგიური ინსტიტუტის ისტორიის კათედრის ლაბორანტად; 1978-1991წწ. პარალელურად მუშაობდა ბათუმის ნ. ბერძენიშვილის სახელობის სამეცნიერო კვლევითი ინსტიტუტის არქეოლოგიის განყოფილებაში მეცნიერ-მუშაკად; 1978-1995წწ. აჭარისწყლის ხეობის არქეოლოგიური ექსპედიციის ხელმძღვანელად; 1980-1988წწ. ბათუმის სახელმწიფო პედაგოგიური ინსტიტუტის ისტორიის კათედრის ასისტენტად; 1988-1992წწ. უფროს მასწავლებლად; 1992-2004წწ. ბათუმის სახელმწიფო უნივერსიტეტის საქართველოს ისტორიის კათედრის დოცენტად; 1994 წლიდან მუშაობს გონიო-აფსაროსის არქეოლოგიურ-არქიტექტურული მუზეუმ-ნაკრძალის მმართველად; 2004-2006წწ. არქეოლოგია-ეთნოლოგიის კათედრის პროფესორად და ამავე კათედრის გამგედ; 2005 წლიდან არის გონიო-აფსაროსის მუდმივმოქმედი არქეოლოგიური ექსპედიციის ხელმძღვანელი; პარალელურად 2006-2013წწ. იყო დეპარტამენტის ხელმძღვანელიც; 2007-2019წწ. მუშობდა ისტორიის, არქეოლოგიისა და ეთნოლოგიის დეპარტამენტის სრულ პროფესორად; 2019 წლიდან არის ამავე დეპრტამენტის ემერიტუს პროფესორი; 1973 წლიდან მონაწილეობა აქვს მიღებული 70-ზე მეტ ექსპედიციაში საქართველოსა თუ მის ფარგლებს გარეთ; იყო გონიო-აფსაროსის ქართულ გერმანული, ქართულ-იტალიური და 2014 წლიდან კი ქართულ-პოლონური ერთობლივი არქეოლოგიური ექსპედიციების  ხელმძღვანელი;  უნივერსიტეტში სწავლების სამივე საფეხურზე სხვადასხვა დროს ასწავლიდა: ზოგად არქეოლოგიას, მხარეთმცოდნეობას, საქართველოს ისტორიას უძველესი დროიდან მეცამეტე საუკუნემდე, შუასაუკუნეების არქეოლოგიას, არქეოლოგიური კვლევის მეთოდებს, კვლევის ხერხებსა და მეთოდებს და სხვა; სამივე საფეხურზე ხელმძღვანელობდა საველე არქეოლოგიურ პრაქტიკას აჭარის სხვადასხვა ძეგლებზე; მის მიერ შედგენილი იქნა  არქეოლოგიის სამაგისტრო, არქეოლოგიისა და ისტორიის სადოქტორო აკრედიტირებული საგანმანათლებლო პროგრამები; ხელმძღვანელობს არქეოლოგიის სამგაგისტრო და სადოქტორო პროგრამებს; გამოქვეყნებული აქვს 180-ზე მეტი სამეცნიერო ნაშრომი და 15 მონოგრაფია; 60-ზე მეტი ნაშრომი გამოქვეყნებულია საზღვარგარეთ: ინგლისში, საფრანგეთში, გერმანიაში, იტალიაში, პოლონეთში, ბელგიაში, რუმინეთში, ბულგარეთში, რუსეთში, თურქეთში, უკრაინში და სხვა ქვეყნებში; მონაწილეობა აქვს მიღებული 70 -მდე საერთაშორისო და 40-მდე ადგილობრივ სამეცნიერო კონგრესებში, კონფერენციებსა თუ სიმპოზიუმებში; სხვადასხვა დროს იყო 10-მდე გრანტის ხელმძღვანელი თუ ძირითადი შემსრულებელი; არის სხვადასხვა გამოცემების რედაქტორი, რედკოლეგიის წევრი; იყო უნივერსიტეტის აკადემიური საბჭოს, ნ. ბერძენიშვილის სახელობის ინსტიტუტის, ბათუმის არქეოლოგიური მუზეუმის სამეცნიერო საბჭოს წევრი, გონიო-აფსაროსის მუზეუმ-ნაკრძალის სამეცნიერო საბჭოს ხელმძღვანელი. მისი ხელმძღვანელობით დაცული იქნა 15 სამაგისტრო და 9 სადოქტორო დისერტაცია; შუახევის მუნიციპალიტეტისა და ზამლეთის თემის საპატიო მოქალაქე.

საკანდიდატო დისერტაციის თემა - "აჭარისწყლის ხეობა განვითარებულ შუასაუკუნეებში (არქეოლოგიური მასალებისა და წერილობითი წყაროების მიხედვით)", დაიცვა 1991 წელს; სადოქტორო დისერტაციის თემა - "აჭარისწყლის ხეობა უძველესი დროიდან გვიანშუასაუკუნეებამდე (ისტორიულ-არქეოლოგიური გამოკვლევა)", დაიცვა 2002 წელს.

წყარო: აჭარის კულტურული მემკვიდრეობის დაცვის სააგენტო: facebook.com

• ტბელ აბუსერისძის სახელობის პრემია
• ივანე ჯავახიშვილი სახელობის პრემია

• გონიო-აფსაროსი = Gonio-Apsarus : გზამკვლევი (თანაავტორი). - ბათუმი, გამ-ბა "სამშობლო", 2019. - 120გვ.. - ISBN: 9789941967528
• აჭარისწყლის ხეობა უძველესი დროიდან გვიან შუასაუკუნეებამდე. (ავტორი) // ტომი 2, დანართი. - ბათუმი, 2002. - 168გვ.
• აჭარისწყლის ხეობა უძველესი დროიდან გვიან შუასაუკუნეებამდე : ისტორიულ-არქეოლოგიური გამოკვლევა (ავტორი) // ტომი 1. - ბათუმი, 2002. - 352გვ.
• აჭარისწყლის ხეობის მატერიალური კულტურის ძეგლები : გზამკვლევი (ავტორი). - თბილისი, სანი, 2000. - 102გვ.
• აჭარისწყლის ხეობის შუასაუკუნეების არქეოლოგიური ძეგლები (ავტორი). - ბათუმი, აჭარა, 1993. - 224გვ.