ანასტასია ნიკოლაძე

დაბადების ადგილი: ქ. ქუთაისი.

დაამთავრა ქუთაისის წმინდა ნინოს სახელობის ქალთა სასწავლებელი.

1883 წელს დასთან, ეკატერინე ნიკოლაძესთან ერთად ქუთაისში დააარსა მხატვრული ჟურნალი "ქართული ბიბლიოთეკა", რომლის რედაქტორი იყო ეკატერინე ჭყონია-ლორთქიფანიძე, რადგან მთავრობა ნიკოლაძის ქალებს, როგორც პოლიციის მეთვალყურეობის ქვეშ მყოფთ, არ ენდობოდა; ჟურნალში თანამშრომლობდნენ ოლგა და მარიამ ხელთუფლიშვილები, ელენე ყიფიანი-ლორთქიფანიძე (დავით ყიფიანის ქალიშვილი), ანა სიმონის ასული მესხი-პეტრიაშვილი და სხვ.; ჟურნალის მთავარი ხელმძღვანელები და რედაქტორ-კორექტორები უმთავრესად ეკატერინე და ანასტასია ნიკოლაძეები იყვნენ; ჟურნალი 1883-1884 წლებში გამოდიოდა, იმავე ხანებში ისინი ღარიბ ბავშვებს წერა-კითხვას ასწავლიდნენ; 1884-1885 წლებში დებმა- ანასტასია, ეკატერინე და ეფროსინ ნიკოლაძეებმა, რომელიც ალექსი ჭიჭინაძის მეუღლე იყო, ქუთაისში კერძო სკოლა დააარსეს; 1890 წელს ეკატერინემ და ანასტასიამ ქუთაისში, თავიანთ სახლში კერძო პანსიონი გახსნეს; ეს კერძო პანსიონი 1918 წლამდე არსებობდა. 1890-იან წლებში, ოლიმპიადა, ანასტასია, ეკატერინე და ეფროსინე ნიკოლაძეები მონაწილეობას იღებდნენ ქუთაისის საზოგადოებრივ-კულტურულ საქმიანობაში. იაკობ ნიკოლაძის ქალიშვილი, ნიკო ნიკოლაძის და.

წყარო: ქართველ მოღვაწეთა ლექსიკონი, 1801-1952: ტ. III მ-რ / იოსებ იმედაშვილი.-თბ.,2021.-გვ.556; mshoblebi.ge; church.ge; archive.gov.ge

• ჯიანეტა. პატარა მოქანდაკის დღიური (მთარგმნელი). - ქუთაისი, ქუთათური ამხ. გამოცემა N20; (კომერციული საბეჭდავი ვ. ჭილაძისა), 1903. - 186გვ.
• მოთხრობანი ქართველის ქალებისაგან ნათარგმნი : ნაწ. 1 სოფელი ტრეპპი / პოლ გეიზესი; ანტუან მატიე / პოლ გეიზესი; მკერვალი ქალი / ვაგნერისა (მთარგმნელი) // გვ.66-139. - ტფილისი, გრ. ჩარკვიანის გამოც., 1880. - 168გვ.