ზურაბ სეფერთელაძე

დაბადების ადგილი: ქ. ქობულეთი.

დაამთავრა თბილისის სახელმწიფო უნივერსიტეტის გეოგრაფია-გეოლოგიის ფაკულტეტი ფიზიკური გეოგრაფიის სპეციალობით 1971 წელს. 1972-1976წწ. გაიარა ასპირანტურის კურსი.

1974-1985წწ. თბილისის სახელმწიფო უნივერსიტეტის მასწავლებელი; 1985-1994წწ. თბილისის სახელმწიფო უნივერსიტეტის დოცენტი; 1994-1996წწ. პროფესორი; 1996-2006წწ. ფიზიკური გეოგრაფიის კათედრის გამგე; 2000-2006წწ. ვახუშტი ბაგრატიონის სახელობის გეოგრაფიის ინსტიტუტი, ფიზიკური გეოგრაფიის განყოფილების გამგე (შეთავსებით); 2003-2005წწ. თბილისის სახელმწიფო უნივერსიტეტის გეოგრაფიის ფაკულტეტის დეკანის მოადგილე სამეცნიერო მუშაობის დარგში; 2006-2012წწ. პროფესორი, ფიზიკური გეოგრაფიის მიმართულება; 2012-2016წწ. პროფესორი, ბუნებათსარგებლობის გეოგრაფიის მიმართულების ხელმძღვანელი; 2017 წლიდან პროფესორი, ბუნებათსარგებლობის გეოგრაფიის კათედრის გამგე. მის სადისერტაციო ნაშრომში გაანალიზებულია ბუნებრივ-ანთროპოგენური კომპლექსების ჩამოყალიბებისა და მისი შემდგომი დიფერენციაციის კანონზომიერებანი; განხილულია მისი დიფერენციაციისა და ფიზიკურ-გეოგრაფიული დარაიონების უახლესი პრინციპები და მეთოდები. ბუნებრივ ანთროპოგენური ლანდშაფტების კლასიფიკაციისას გათვალისწინებულია ადამიანის სამეურნეო ზემოქმედების გარკვეული მიმართულება სახალხო მეურნეობის დარგებში, ადამიანის სამეურნეო ზემოქმედების ხასიათი და ტერიტორიების სამეურნეო ათვისება-გამოყენების პოტენციური შესაძლებლობები; შეიმუშავა ბუნებრივი კომპლექსები რეგიონული და ტიპოლოგიურ ერთეულთა თვისობრივად ახალი სისტემა; შეადგინა ძირითადი ბუნებრივ-ანთროპოგენური ლანდშაფტების რუკა. მისი სამეცნიერო ინტერესებია: საქართველოს ბუნებრივ-ანთროპოგენური ლანდშაფტები; რეგიონული ბუნებათსარგებლობის და გარემოს მდგრადი განვითარების პრობლემები; კომპლექსური ფიზიკურ გეოგრაფიული და ლანდშაფტურ-ეკოლოგიური პრობლემები; დასავლეთ საქართველოს ბუნებრივ-გეოგრაფიული ზონირება სუბტროპიკულ კულტურათა გავრცელების ოპტიმალური პირობების გამოვლენის მიზნით. გამოქვეყნებული აქვს სამეცნიერო ნაშრომები. 2000 წლიდან კავკასიის გეოგრაფიული ჟურნალი, რედკოლეგიის წევრი; 2000 წლიდან ჟურნალი "საქართველოს გეოგრაფია", რედკოლეგიის წევრი. გეოგრაფიულ მეცნიერებათა დოქტორი, პროფესორი (1995).

საკანდიდატო დისერტაციის თემა - "ამიერკავკასიის ნოტიო სუბტროპიკების გამოყენებითი ლანდშაფტური დახასიათება (შავი ზღვის აჭარა-გურიის ზღვისპირა მაგალითზე)", დაიცვა 1984 წელს; სადოქტორო დისერტაციის თემა - "ბუნებრივ-ანთროპოგენური კომპლექსების დიფერენციაციისა და ბუნებათსარგებლობის პრობლემები (ანალიზი და სინთეზი)", დაიცვა 1993 წელს.

წყარო: ქართველი მოგზაურები, გეოგრაფები, ბუნების მკვლევარნი: ენციკლოპედიური ცნობარი.-თბ., 2003. -გვ.231-232; თბილისის სახელმწიფო უნივერსიტეტი: tsu.ge

• საქართველოს საბუნებისმეტყველო მეცნიერებათა აკადემია, წევრი (1995-)

• მსოფლიოს ფიზიკური გეოგრაფია : კონტინენტები და ოკეანეები : სახელმძღვ. (თანაავტორი). - თბილისი, თბილ. უნ-ტის გამ-ბა, 2013. - 248გვ. . - ISBN: 9789941132810
• გეოგრაფია ეკოლოგებისათვის : სახელმძღვ. (თანაავტორი). - თბილისი, თბილ. უნ-ტის გამ-ბა, 2013. - 144გვ.. - ISBN: 9789941132698
• ბუნებათსარგებლობის გეოგრაფია : სახელმძღვ. (ავტორი). - თბილისი, თბილ. უნ-ტის გამ-ბა, 2011. - 232გვ.. - ISBN: 9789941131943
• ფიზიკურ-გეოგრაფიული დარაიონება და ლანდშაფტურ-ეკოლოგიური პრობლემები (ავტორი). - თბილისი, თბილ. უნ-ტის გამ-ბა, 2009. - 228გვ.. - ISBN: 9789941130441
• ფიზიკურ-გეოგრაფიული დარაიონება (ავტორი). - თბილისი, თბილ. უნ-ტის გამ-ბა, 1989. - 123გვ.