იოველ ქუთათელაძე

დაბადების ადგილი: ქ. ხონი.

დაამთავრა ნოვოროსიის (ოდესა) უნივერსიტეტის ფარმაცევტული ფაკულტეტი 1910 წელს.

უნივერსიტეტის დამთავრების შემდეგ ოდესაში აფთიაქის მმართველად დაიწყო მუშაობა. 1911 წელს გამოცდები ჩააბარა ნოვოროსიის უნივერსიტეტში ფარმაციის მაგისტრის წოდებაზე; იმავე წელს მუშაობა დაიწყო ნოვოროსიის უნივერსიტეტის სამედიცინო ფაკულტეტის ფარმაციისა და ფარმაკოგნოზიის კათედრის შტატგარეშე ასისტენტად. აქედან დაიწყო მისი მეცნიერული და პედაგოგიური მოღვაწეობა; 1913 წელს იგი გადავიდა ფარმაკოლოგიის კათედრაზე; 1919 წელს საჯაროდ დაიცვა დისერტაცია; 1915 წელს ნოვოროსიის უნივერსიტეტის სამეცნიერო საბჭომ აირჩია იგი ფარმაკოლოგიის კათედრის პროზექტორის თანაშემწედ, შემდეგ პროზექტორად; 1920 წელს ჯერ პირავტ-დოცენტის, ხოლო შემდეგ დოცენტის წოდება მიანიჭეს; 1920 წელს ოდესის უნივერსიტეტის სამედიცინო ფაკულტეტი ჯერ სამედიცინო ინსტიტუტად, შემდეგ კი სამედიცინო აკადემიად გადაკეთდა. იოველ ქუთათელაძე ინსტიტუტის მდივნად და აკადემიის პრორექტორად აირჩიეს; 1921 წელს სამედიცინო აკადემიის საბჭომ იგი ფარმაციისა და ფარმაკოგნოზიის კათედრის გამგედ დანიშნა და პროფესორის წოდება მიანიჭა; ამავე პერიოდში იგი დაუსწრებლად სწავლობდა ნოვოროსიის სამედიცინო ინსტიტუტის სამკურნალო ფაკულტეტზე; 1921 წელს იგი მიიწვიეს თბილისის სახელმწიფო უნივერსიტეტის ფარმაციისა და ფარმაკოგნოზიის კათედრის პროფესორად; 1924 წლიდან განაგებდა უნივერსიტეტის ანალიზური და სასამართლო ქიმიის კათედრებს; 1927-1930წწ. სათავეში ედგა ბიოლოგიური ქიმიის კათედრასაც და კითხულობდა ლექციებს შესაბამის დისციპლინებში. 1930 წელს უნივერსიტეტს გამოეყო და ცალკე ჩამოყალიბდა თბილისის სახელმწიფო სამედიცინო ინსტიტუტი, რომელშიც შედიოდა ფარმაკო-ქიმიური ფაკულტეტიც; 1937 წლიდან იგი გამოუკიდებელ ფარმაცევტულ ინსტიტუტად გადაკეთდა; ფარმაკო-ქიმიური ფაკულტეტის დეკანად, ხოლო შემდეგ ფარმაცევტული ინსტიტუტის დირექტორად პროფესორი ი. ქუთათელაძე დაინიშნა; 1948 წელს ფარმაცევტული ინსტიტუტი შეუერთდა სამედიცინო ინსტიტუტს და იგი კვლავ განაგებდა სასამართლო და ანალიზური ქიმიის კათედრებს და სიცოცხლის ბოლომდე არ შეუწყვეტია პედაგოგიური მოღვაწეობა. ფარმაცევტი, მედიცინის მეცნიერებათა დოქტორი.

წყარო: ივანე ჯავახიშვილის სახელობის თბილისის სახელმწიფო უნივერსიტეტი: ebooks.tsu.ge; ქართული სამედიცინო ინტერნეტ-ქსელი: edu.; medgeo.net; ქართული საბჭოთა ენციკლოპედია, ტ. 10. - თბ., 1986. - გვ. 568-569.

• საქართველოს მეცნიერებათა აკადემია, აკადემიკოსი (1946-1963)

• 1941 - საქართველოს მეცნიერებათა დამსახურებული მოღვაწე
• შრომის წითელი დროშის ორდენი
• ლენინის ორდენი

• შრომათა კრებული (ავტორი) // ნაწ. 1. - თბილისი, მეცნიერება, 1972. - 328გვ.
• დარიგებანი ზოგიერთი სამკურნალ-წამლო მცენარეთა მოკრეფისა და გაშრობის შესახებ (ავტორი). - ტფილისი, სახელგამი, 1931. - 35, 1გვ.
• ქიმიის ტერმინოლოგიის მასალები (ავტორი). - ტფილისი, პ/სკ. სტ., 1930. - 59გვ.
• ზოგიერთ სამკურნალ-წამლო ნივთიერებათა რაციონალურად გამოწერის და მომზადების შესახებ (ავტორი) // ამონაბეჭდი. თანამედროვე მედიცინა, 1929, XI, XII.. - ტფილისი, 1929. - 668-682გვ.
• ფარმაციის დარგში მომუშავეთა უმაღლესი სწავლა-განათლების საკითხი საქართველოში (ავტორი) // ამონაბეჭდი. - ტფილისი, 1928. - 257-271გვ.