მიხაკო წერეთელი

დაბადების ადგილი: სოფელი ცხრუკვეთი, ჭიათურის რაიონი.

დაამთავრა ჰაიდელბერგის (გერმანია) უნივერსიტეტის ისტორია-ფილოლოგიის ფაკულტეტი ძველი აღმოსავლეთის ისტორიის განხრით 1912 წელს.

1900-1907წწ. მ. წერეთელი ცხოვრობდა და მოღვაწეობდა საფრანგეთსა და შვეიცარიაში. აქტიურად იყო ჩაბმული ანარქისტულ საქმიანობაში. ამასთან, ეწეოდა ნაყოფიერ პუბლიცისტურ მოღვაწეობას. ფსევდონიმებით "Baton" და "მ. სანგალა" წერილებს აქვეყნებდა როგორც ქართულ, ისე უცხოეთის პერიოდულ პრესაში. 1901 წელს ანარქისტულ დემონსტრაციაში მონაწილეობისათვის ის პარიზიდან გაასახლეს. 1907 წელს საქართველოში დაბრუნდა. მომდევნო წლებში მეცნიერი საზღვარგარეთ ცხოვრობდა. ჰაიდელბერგის უნივერსიტეტში მ. წერეთელი ასიროლოგიაში დახელოვნდა და 1918–1923წწ. ბრიუსელისა და ბერლინის უნივერსიტეტებში მუშაობდა. 1912 წელს გამოაქვეყნა გამოკვლევა "სუმერული და ქართული" (თბილისი), 1923 წელს – "გილგამეშიანის" ქართული თარგმანი განმარტებებითურთ (კონსტანტინოპოლი), 1933 წელს კი სულხან საბას "სიბრძნე–სიცრუისას" გერმანული თარგმანი(ბერლინი). 1945 წლიდან იგი ცხოვრობდა და მოღვაწეობდა მიუნხენში. მ. წერეთელი იყო ქართული ემიგრანტული პერიოდული პრესის აქტიური თანამშრომელი. მისი უშუალო მონაწილეობით პარიზში დაარსდა სამეცნიერო ჟურნალი "ბედი ქართლისა", რომელშიც გამოქვეყნებულია მ. წერეთლის არაერთი საყურადღებო წერილი. მათ შორის აღსანიშნავია დავით აღმაშენებლისა და თამარ მეფის ცხოვრების ტექსტები გერმანული თარგმანითურთ (1957-1958). გარდა ამისა, მისი სტატიები ქვეყნდებოდა ინგლისურენოვანი სამეცნიერო ჟურნალის "Georgica" (ლონდონი) ფურცლებზე. ფრანგულ, გერმანულ, ინგლისურ, იტალიურ ენებზე აქვეყნებდა გამოკვლევებსა და წერილებს ქართული ენისა და ქართველების წარმოშობის საკითხებზე, ურარტუს ისტორიასა და ენაზე. 1961 წელს პარიზში გამოქვეყნდა შოთა რუსთაველის "ვეფხისტყაოსნის"  მ. წერეთლის მიერ დადგენილი ტექსტი.

წყარო: საქართველოს დემოკრატიული რესპუბლიკა (1918-1921): ენციკლოპედია -ლექსიკონი. -თბ., 2018.-გვ.520

• ქართველ ტრადიციონალისტთა კავშირი, ერთ-ერთი დამფუძნებელი (1942-)
• ქართული პატრიოტული პოლიტიკური ორგანიზაცია "თეთრი გიორგი", ერთ-ერთი ლიდერი (1926-)
• ქართული სამოკავშირეო კომიტეტი(გერმანია), ერთ-ერთი ხელმძღვანელი (1940-1945)

• 2013 - საქართველოს ეროვნული გმირი (გარდაცვალების შემდგომ)

• გილგამეშიანი : ბაბილონური ეპოსი: მესამე ათასეულისა ქრ.წ (მთარგმნელი). - თბილისი, თბილ. უნ-ტის გამ-ბა, 2010. - 140გვ.. - ISBN: 978-9941-13-175-2
• ერი და კაცობრიობა : სოციოლოგური ანალიზი (ავტორი). - თბილისი, თბილ. უნ-ტის გამ-ბა, 1990. - 334გვ.
• ერი და კაცობრიობა, განხილულნი სოციოლოგიურის მხრით (ავტორი). - თბილისი, სტ. ამხ. "შრომა", 1910. - 382გვ.
• სახელმწიფო ძალის ხელში ჩაგდება და სოციალური რევოლიუცია (ავტორი). - თფილისი, ამხ. "შრომა"-ს სტ., 1906. - 110გვ.
• პასუხი პროტესტანტებს (ავტორი). - თბილისი, გამოცემა "მუშისა", 1906. - 45გვ.
• კანონი : სოციოლოგიური ეტიუდი (ავტორი). - ტფილისი, სტ. "იდეალი", 1906. - 119გვ.
• მუშათა მოძრაობა საფრანგეთში 1789 წლამდე : დიდ რევოლიუციამდე (ავტორი). - თბილისი, "თემის" გამოცემა, 1906. - 107გვ.