ოზურგეთი

წინასწარი შედეგების მიხედვით, ოზურგეთის რაიონში 40 033-მა ამომრჩეველმა გაიარა რეგისტრაცია, ხოლო არჩევნებში 39 400-მა მიიღო მონაწილეობა. აქედან მიხეილ სააკაშვილმა 37 167 ხმა მიიღო, 1 200 ხმა, ანუ 3 პროცენტი თემურ შაშიაშვილმა მოიპოვა, 144 – როინ ლიპარტელიანმა, 80 ხმა – ზაზა სიხარულიძემ და 30 ხმა – ქართლოს ღარიბაშვილმა.

საოლქო კომისიის მიერ გუშინ მიღებული გადაწყვეტილებით, ბოხვაურის საარჩევნოუბნის შედეგები გაუქმდა. საოლქო კომისიის იურისტის კახა ინწკირველის განცხადებით, ამის მიზეზი ის გახდა, რომ საბოლოო ოქმში ერთ-ერთი კანდიდატის სასარგებლოდ ამომრჩევლის საერთო რაოდენობაზე20 პეროცენტით მეტი ხმა დაფიქსირდა. მაგალითად, მიხეილ სააკაშვილმა 1 350 ხმა მიიღო, მაშინ როცა უბნის ამომრჩეველთა საერთო რაოდენობა 1 200-ია.

იგივე მიზეზით გაუქმდა სოფელ ბახვის საარჩევნო უბნის გადასატან ყუთში დაფიქსირებული შედეგებიც.

უნდა აღინიშნოს, რომ ,,ლეიბორისტული პარტიის” და აღორძინების კავშირის” წარმომადგენლებმა პრეზიდენტის არჩევნებში მონაწილეობა მიიღეს.