რევაზ დუმბაძე

სამხედრო ინჟინრის, გენერალ–მაიორ სამსონ დუმბაძის უმცროსი ვაჟი რევაზ დუმბაძე 1900 (ან 1899) წელს დაიბადა. ოჯახის ტრადიციას არც მან უღალატა და სამხედრო საქმეს მიუძღვნა ცხოვრება. 1918 წელს დაამთავრა ოდესის კადეტთა კორპუსი. სამოქალაქო ომის დროს იბრძოდა თეთრგვარდიელთა მხარეს მოხალისეთა არმიაში. I ცხენოსანთა პოლკის შემადგენლობაში მონაწილეობდა ყუბანის პირველ (ყინულოვან) ლაშქრობაში. მიღებული აქვს წმ. გიორგის ჯვრის IV ხარისხის ორდენი. იმავე პოლკის წევრი იყო სამხრეთ რუსეთის შეიარაღებულ ძალებში. 1919 წლის 1 ნოემბრიდან ატარებდა პრაპორშჩიკის ჩინს. რუსულ არმიასთან ერთად წავიდა ევაკუაციაში ყირიმიდან გალიპოლში. 1920 წელს გენერალ კუტეპოვის ადიუტანტია, კორნეტი. 1920–1922 წლებში ბულგარეთში იმყოფება. 1920 წლის 18 დეკემბრისთვის 1–ლი საარმიო კორპუსის მმართველობაშია გალიპოლში. 1925 წლის შემოდგომაზე ვხედავთ გალიპოლის 1–ლი როტის შემადგენლობაში, იუგოსლავიაში. ამ დროს უკვე პორუჩიკია. იქვე დარჩა ემიგრაციაში. 1941 წლის აგვისტოში მისი კვალი იკვეთება იუგოსლავიის არმიაში, სადაც უნტერ–ოფიცერია ან რეზერვის ჯარისკაცი.

რუსეთის არმიის გენერლები იყვნენ რევაზ დუმბაძის ბიძები – ივანე, ნიკოლოზი, იოსები და მიხეილი. სამხედროები იყვნენ მისი ძმებიც – ლევან დუმბაძე, რუსეთის არმიის პოლკოვნიკი (ემიგრირებული იყო იუგოსლავიაში) და გიორგი დუმბაძე, კაპიტანი. იბრძოდა თეთრგვარდიელთა რიგებში აღმოსავლეთის ფრონტზე. ემიგრაციაში იმყოფებოდა ამერიკაში, ლოს–ანჟელესში.

წყარო:

1. rosgenea.ru/?alf=5&serchcatal=Думбадзе&r=4 

2. zav.ansya.ru/health/nastoyashaya-kniga.../pg-7.html

3. www.sammler.ru