ნინო უსანეთაშვილი

აშშ-ში მცხოვრები ექიმი ნინო უსანეთაშვილი დაიბადა და გაიზარდა თბილისში. მის ოჯახში მედიცინა ყოველდღიური ცხოვრების ნაწილი იყო, დედა ექიმი ჰყავდა და ნინოც ბავშვობიდან ექიმობაზე ოცნებობდა.

1997–2003 წლებში სწავლობდა დავით ტვილდიანის სახელობის სამედიცინო სკოლა “აიეტში”, სადაც სასწავლო პროგრამა ინგლისურ ენაზე მიმდინარეობდა და მიზნად ისახავდა სტუდენტების მომზადებას საერთაშორისო სამედიცინო კარიერისთვის.

ამ სასწავლებელში ნინომ გამიზნულად ჩააბარა, რადგან განათლების გაგრძელებას ამერიკის შეერთებულ შტატებში აპირებდა, რამეთუ იმ პერიოდის საქართველოში ახალგაზრდა ექიმებისთვის განვითარების შესაძლებლობები ძალიან შეზღუდული იყო.

ნინო უსანეთაშვილი ინსტიტუტის დამთავრებისთანავე, 2003 წელს გაემგზავრა ამერიკაში და დაიწყო რეზიდენტურის აპლიკაციის რთული პროცესი, USMLE გამოცდები, გასაუბრებები სხვადასხვა შტატში, ფინანსური სირთულეები და სრულიად ახალ გარემოსთან ადაპტაცია. ეს გზა მარტივი არ ყოფილა, თუმცა ახალბედა ექიმი თითოეულმა ნაბიჯმა გააძლიერა და მიზანდასახულობა კიდევ უფრო გაუმყარა.
ნინო უსანეთაშვილის პროფესიული გზა ქალაქ ჩიკაგოში დაიწყო, როზალინდ ფრანკლინის უნივერსიტეტის შინაგანი მედიცინის რეზიდენტურაში, რაც გარდამტეხი ეტაპი აღმოჩნდა მის კარიერაში. რეზიდენტურის დასრულების შემდეგ გადავიდა შტატ NH ში, სადაცვ მუშაობდა ჰოსპიტალისტად 13 წლის განმავლობაში, ემსახურებოდა რამდენიმე მცირე საავადმყოფოს და მოხუცთა სახლებს. სამუშაო პირობები ძალიან რთული იყო, მაგრამ სწორედ ამ სირთულეებმა მიაჩვია დამოუკიდებლობას, სწრაფი გადაწყვეტილებების მიღებას და ძალიან გაზარდა პროფესიულად. 

რამდენიმე წლის წინ ნინო კვლავ დაბრუნდა ჩიკაგოში, რათა ოჯახის გვერდით ყოფილიყო. ბოლო ხუთი წელია მუშაობს Lutheran General Hospital -ში ჰოსპიტალისტის პოზიციაზე. კლინიკური პრაქტიკის გარდა, აქტიურად მონაწილეობს რეზიდენტურის საგანმანათლებლო პროგრამაში. არის ფაკულტეტის წევრი, ასწავლის ინტერნალური მედიცინის რეზიდენტებს, ასევე, სტუდენტებს და მომავალი თაობის ექიმების განვითარებაში წვლილის შეტანა დიდ პროფესიულ კმაყოფილებას ანიჭებს.
ნინო უსანეთაშვილი მუდმივად იღრმავებს ცოდნას და პროფესიულად ვითარდება, რადგან ექიმისთვის უაღრესად მნიშვნელოვანია დაავადებების ადრეული პრევენცია, რთული შემთხვევების ეფექტიანი მართვა, მოვლის უკეთესი კოორდინაცია.  
თუმცა მისი ცხოვრება, მხოლოდ სამსახურით არ შემოიფარგლება. იგი არც ოჯახს ივიწყებს და არც სამშობლოს, - „ ჩემი ქართული იდენტობა მუდამ ჩემი ნაწილია. ჩიკაგოში გვაქვს პატარა ქართული დიასპორა, სადაც ვცდილობთ შევინარჩუნოთ ტრადიციები, აღვნიშნოთ დღესასწაულები და მოვამზადოთ ქართული კერძები – ეს „პატარა საქართველო“ აქ ჩვენს შვილებსაც გადაეცემა“, ამბობს ქართველი ექიმი.

წყარო:

#სფიჩი #სპიჩი #speech #speechmedia #ქართველიპროფესიონალებიუცხოეთში