The National Library of Georgia მთავარი - ბიბლიოთეკის შესახებ - ელ.რესურსები 
  შესვლა
ქართველები უცხოეთში
დასაწყისი  
ძიება
პიროვნების სახელი:

უცხოეთში მოღვაწე გამოჩენილი ქართველების (მეფეები, პოლიტიკური და საზოგადო მოღვაწეები, მწერლები, ხელოვნების მუშაკები, მეცნიერები, სასულიერო პირები, სამეფო და თავადაზნაურთა ოჯახების წარმომადგენლები, ქველმოქმედები) მოღვაწეობა და ბიოგრაფიები.
ტექსტები მოცემულია ქართულ და ინგლისურ ენებზე.


ლევან ფაღავა

ლევან ფაღავა
დაბადების თარიღი:თებერვალი, 1907
გარდაცვ. თარიღი:1998  (90 წლის ასაკში)
დაკრძალვის ადგილი:ლევილი, საფრანგეთი
კატეგორია:პოლიტიკოსი

ბიოგრაფია

ლევან ფაღავა 1907 წლის თებერვლის თვეშია დაბადებული. მამამისი, სამსონ ფაღავა,  იყო ჭიათურის სოციალ–დემოკრატიული პარტიის ერთ–ერთი დამაარსებელი. ლევანიც მამის გზას გაჰყვა. იგი ჭიათურის ახალგაზრდობის მეთაური და სულისჩამდგმელი გახდა და 17 წლის ასაკში მაღაროს მუშებთან ერთად აქტიურ მონაწილეობას იღებდა 1924 წლის აგვისტოს აჯანყებაში. მათ ხელში ჩაიგდეს სამაზრო ქალაქის სტრატეგიულად მნიშვნელოვანი ობიექტები და საქართველოს ემიგრირებული მთავრობის იურისდიქციის აღდგენა გამოაცხადეს, მაგრამ საბოლოოდ მაინც დამარცხდნენ. 

ამბოხებულთაგან უმეტესობა დაიჭირეს და დახვრიტეს. ლევანი შემთხვევით გადარჩა და რადგან საქართველოში აღარ დაედგომებოდა 1925 წელს საფრანგეთს შეაფარა თავი.

1929 წელს მან დაამთავრა სტრასბურგის უნივერსიტეტი ეკონომიური განხრით და პარიზში მყოფ ქართველ სოციალ–დემოკრატებს შეუერთდა. აქ მან გაიცნო ნოე ჟორდანიას ქალიშვილი ასმათი. ისინი მალე შეუღლდნენ, შეეძინათ ორი ქალიშვილი – ეთერი და ქრისტინე. ეთერ ფაღავა შემდგომში ცნობილი ბალერინა და ქორეოგრაფი გახდა.

ლევან ფაღავა სოციალ–დემოკრატიული პარტიის საზღვარგარეთული ბიუროს წევრი იყო და ხელმძღვანელობდა ბიუროს პერიოდული ორგანოს – ნოე ჟორდანიას მიერ დაარსებულ ჟურნალ „ჩვენი დროშის“ გამოცემას 1970–იანი წლებიდან 1990–იან წლებამდე.

სიცოცხლის ბოლო წლებში ცხოვრობდა ლევილის მამულში შვილიშვილთან, ტარიელთან ერთად. გარდაიცვალა 1998 წელს. დაკრძალულია ლევილის ქართველთა სასაფლაოზე.

წყარო: 

1. ჩუბინიძე, ვალიკო. ლევან ფაღავას შეუსრულდა 80 წელი / ვალიკო ჩუბინიძე // მებრძოლი საქართველო / ქართული ეროვნული საბჭოს ორგანო. - პარიზი, 1987. - მაისი. - N3(21). - გვ.56-57

2. შარაძე, გურამ. უცხოეთის ცის ქვეშ. . 3. – თბილისი, 1993. – გვ. 360  


გააზიარე: