The National Library of Georgia მთავარი - ბიბლიოთეკის შესახებ - ელ.რესურსები 
  შესვლა
ქართველები უცხოეთში
დასაწყისი  
ძიება
პიროვნების სახელი:

უცხოეთში მოღვაწე გამოჩენილი ქართველების (მეფეები, პოლიტიკური და საზოგადო მოღვაწეები, მწერლები, ხელოვნების მუშაკები, მეცნიერები, სასულიერო პირები, სამეფო და თავადაზნაურთა ოჯახების წარმომადგენლები, ქველმოქმედები) მოღვაწეობა და ბიოგრაფიები.
ტექსტები მოცემულია ქართულ და ინგლისურ ენებზე.


სერგი დონდუა

სერგი დონდუა
დაბადების თარიღი:1 ივლისი, 1922
გარდაცვ. თარიღი:8 აპრილი, 1999  (76 წლის ასაკში)
კატეგორია:მეზღვაური

ბიოგრაფია

სერგი ლევანის ძე დონდუა დაიბადა 1922 წლის 1 ივლისს ქ. თბილისში. ბავშვობა იალტაში გაატარა. 1931 -1941 წწ. სწავლობდა იალტის მე-3 საშუალო სკოლაში; შემდეგ სწავლა განაგრძო ოდესის საზღვაოსნო სასწავლებელში (1945-1948 წწ. დაუსწრებლად), სადაც მიიღო შორეული ნაოსნობის შტურმანის კვალიფიკაცია. 

პარალელურად, 1941-1945 წლებში მუშაობდა იალტის ნავსადგურის პორტფლოტის ავარიულ-სამაშველო და საბრძოლო კატარღა "Курортник"-ზე მესაჭე-მატროსად. ომის დაწყებისთანავე მშვიდობიანი გემი შავი ზღვის ფლოტის ავარიულ-სამაშველო ხომალდად გადაკეთდა, მასზე ტყვიამფრქვევები დააყენეს და საბრძოლველად გაუშვეს, ს. დონდუა ამ გემის მთავარი მესაჭე იყო. მეორე მსოფლო ომის დამთავრებას იგი რუმინეთში, კონსტანცის პორტში შეხვდა. სამხედრო-საზღვაო ფლოტში დარჩენა კი 1948 წლამდე მოუხდა.

1948 წელს ს. დონდუა პირველად წავიდა შორეულ ნაოსნობაში ორთქლმავალ "Александр Пушкин"-ის კაპიტნის მეოთხე თანაშემწის რანგში; მომდევნო წლებში იგი ცურავდა ორთქლმავალ "Николаев"-ის კაპიტნის მეოთხე, მესამე, მეორე და უფროს თანაშემწედ; 1953 წელს კი მან მშრალტვირთა გემ «Карл Маркс»-ის მეთაურობა მიანდეს. 

1957 წელს სერგი დონდუამ დაამთავრა ოდესის უმაღლესი საზღვაო-საინჟინრო სასწავლებელი (ОВИМУ, დაუსწრებლად); 1958 წელს სამგზავრო ორთქლმავალ "Белоостров"-ის კაპიტანი გახდა, მოგვიანებით კი საფრანგეთში აგებული ახალი ხომალდი «Николай Пирогов»-ი ჩაიბარა. მოდევნო წლებში კი მიიღო საბჭოთა კავშირისათვის გერმანიის დემოკრატიულ რესპუბლიკაში აგებული ახალი სამგზავრო გემები "Литва" (1960) და "Тарас Шевченко" (1966).

1974 წელს ს. დონდუამ ჩაიბარა იმ დროისათვის მსოფლიოს ერთ-ერთი საუკეთესო საკრუიზო ლაინერი, საბჭოთა საზღვაო-სამგზავრო ფლოტის ფლაგმანი - "Максим Горький" (ყოფილი-"Hamburg"). ის იყო ამ ლეგენდარული გემის პირველი და უცვლელი კაპიტანი (1986 წლამდე). 

1986 წელს ს. დონდუა პენსიაზე გავიდა. სიცოცხლის უკანასკნელი წლები მან იალტაში გაატარა. გარდაიცვალა 1999 წლის 8 აპრილს, მოსკოვში. ანდერძის თანახმად, ურნა მისი ნეშტის ფერფლით იალტის შუქურიდან ერთი კაბელტოვის მოშორებით ჩაუშვეს ზღვაში.

სერგი დონდუას 1982 წელს მიენიჭა სოციალისტური შრომის გმირის წოდება. ის მრავალი მედლისა და ორდენის კავალერი იყო: მათ შორის: „ლენინის ორდენი“ (ორჯერ); „ოქტომბრის რევოლუციის ორდენი“; „შრომის წითელი დროშის ორდენი“; „წითელი დროშის ორდენი“ და სხვა.

ოდესის საზღვაო სასწავლებლის ფასადზე სერგი დონდუას ხსოვნის საპატივცემულოდ მიმაგრებულია მემორიალური დაფა, სადაც მის პროფილთან ერთად გამოსახულია ლეგენდარული თბომავალი Максим Горький"

წყარო:

1. www.facebook.com › P.TABAGUA › posts შორეული ნაოსნობის კაპიტანი - სერგი...

2. ru.wikipedia.org › wiki › Дондуа,_Серг...

3. odessa-memory.info › ...Дондуа Сергей Леванович


გააზიარე: