ნიკოლოზ ივანეს ძე თუმანიშვილი

ნიკოლოზ ივანეს ძე თუმანიშვილი (თუმანოვი) დაიბადა 1868 წლის 13 თებერვალს, თბილისში.

დაამთავრა თბილისის კადეტთა კორპუსი და ნიკოლოზის საინჟინრო სასწავლებელი (1-ლი თანრიგით), საიდანაც 1885 წლის 14 სექტემბერს მიავლინეს პრაპორშჩიკად  მე-3 მესანგრეთა ბატალიონში.

1886 წლის 11 აგვისტოდან პოდპორუჩიკია; 1888 წლის 9 აგვისტოდან გვარდიის პოდპორუჩიკი; 1892 წლიდან გვარდიის პორუჩიკი. 

1900 წლის 6 მაისს შტაბს-კაპიტნის წოდება მიიღო. ხელმძღვანელობდა  ასეულს.

1901 წელს კაპიტნად დააწინაურეს, 1904 წლიდან კი ინჟინერ-პოდპოლკოვნიკია.

მონაწილეობდა 1904-1905 წწ. რუსეთ-იაპონიის ომში.

1906 წლის 24 აგვისტოს მიენიჭა ლეიბ-გვარდიის მესანგრეთა ბატალიონის პოლკოვნიკის წოდება. 1907 წლის 8 ნოემბრიდან - ბატალიონის მეთაურია.

"ოფიცერთა წოდებების გენერალურ სიის" მიხედვით, 1909 წლის 1 იანვრიდან იყო ქალაქ ვილნოში დისლოცირებული,  ვილნოს სამხედრო ოლქის საინჟინრო ჯარების მე-16 მესანგრეთა ბატალიონის მეთაურის თანამდებობაზე.

1910 წლის 2 სექტემბრიდან  - ვარშავაში დისლოცირებული მე-15 არმიის კორპუსის მე-15 მესანგრეთა ბატალიონის უფროსია.

1913 წლის 21 სექტემბერს დაინიშნა სამხედრო სამინისტროს მთავარი სამხედრო ტექნიკური სამმართველოს უფროს ინჟინერ-ინსპექტორად.

1914-1918 წწ. მონაწილეობდა I მსოფლიო ომში.

პირველი მსოფლიო ომის ქრონიკების მიხედვით, 1914 წლის 6 დეკემბერს დაინიშნა საინჟინრო ჯარების გენერალ-მაიორად; 1915 წლის 18 აპრილიდან იყო მოსკოვის სამხედრო ოლქის საინჟინრო განყოფილების ინსპექტორის თანაშემწე.

ზოგიერთი ცნობით, 1917 წლის დასაწყისში იგი გენერალ-ლეიტენანტად დააწინაურეს. 

1918-1921 წწ. მსახურობდა ქართულ ჯარში.

მიღებული ჰქონდა რუსეთის იმპერიის არმიის სხვადასხვა ხარისხის ორდენები: 1909 წ. - წმინდა ვლადიმირის III ხარისხის; 1905 წ. - წმინდა ანას II ხარისხის; 1903 წ. - წმინდა სტანისლავის II ხარისხის და სხვა.

წყარო:

1. საქართველო: ენციკლოპედია: ტ. IV. -თბ., 2018. -გვ.125

2. http://ru.hayazg.info/Туманов_Николай_Иванович