მონკავშირი

მონადირეების ჯიბის დანა (რომელიც მონკავშირის – მონადირეთა კავშირის – მაღაზიაში იყიდება). „კაროჩე ერთი სუმკა უნდა ჩავაბაროთო, მონკავშირი მომაქო. მეთქი მოგაქ, ჰა მოგაქ, მე არაფერი არ მომაქ და წავედით“ („სუმკის“ ჩაბარებაზე იმიტომ ლაპარაკობს, რომ თვითმფრინავით მიემგზავრებიან და „მონკავშირს“ ბარგად ჩაბარებულ ჩანთაში ჩადებენ, თორემ დანით თვითმფრინავის სალონში არ შეუშვებენ); „გააძრო ბანკით ნიგვზიანი ბადრიჯანები და კიდე ერთი ბანკით პამიდორის წნილი. ის თავისი მონკავშირიც ამოაძრო ჩანთიდან და დავაი წავიდა ბანკებში თევზობა იმ მონკავშირით“ (აკა მორჩილაძე).