შე ჩემის გადანგრეულო

მცირედ ევფემიზებული გინება. „– შე ჩემის გადანგრეულო, ეგ მსოფლიოში ყველაზე ძნელი პროფესია – მათხოვრობა რომ აგირჩევია, წადი რა, ან კაცი მოკალი, ან ბანკი გატეხე, ან იჯიბგირე“ (ნოდარ დუმბაძე). კიდევ უფრო ევფემიზებული ვარიანტი – შე ჩემისა: „შე ჩემისა, მოვდივარ, მიხარია, რომ შენ და ჩემი ძმაკაცი ერთად ხართ“ (აკა მორჩილაძე). და კიდევ უფრო ევფემიზებული – შეჩემა: „შეჩემა-მეთქი, ვეუბნები, განა გისმენს?!“ (ოთარ ჭილაძე).