სისტემა პორტული

(ბერძნ. systema შეერთება, შეკავშირება, ლათ. portae კარი) - ვენა ან ვენების სისტემა, რომლებიც იწყებიან და მთავრდებიან კაპილარებით. უფრო ხშირად ამ სისტემას უწოდებენ ღვიძლის პორტულ სისტემას (hepatic portal system). იგი მოიცავს კარის ვენას და მის განშტოებებს. ელენთიდან, კუჭიდან, პანკრეასიდან, აგრეთვე წვრილი და მსხვილი ნაწლავებიდან გამოსული სისხლი შედის კარის ვენაში და იქიდან ღვიძლში, სადაც კარის ვენა იტოტება სინუსოიდებად წოდებულ მრავალ წვრილ კაპილარად. მათგან ღვიძლის უჯრედებში შედის საკვები ნივთიერებები, აგრეთვე ტოქსინები, რომელთა განეიტრალება ხდება ღვიძლში.