ფილოვირუსები

(ლათ. filum ძაფი, virus შხამი) - აღნიშნული ოჯახი აერთიანებს 2 რნმ-გენომიან სახეობას: 1. მარბურგის ვირუსს, რომელიც 1967 წელს გამოყვეს ქალაქ მარბურგში (მაინის ფრანკფურტის გარეუბანი), აფრიკულ მწვანე მაიმუნებზე მომუშავე ლაბორატორიის თანამშრომლებისაგან და ბელგრადში - ავადმყოფების სისხლისა და სექციური მასალისაგან (იხ. ცხელება მარბურგის); 2. ებოლას ვირუსს, რომელიც 1976 წელს გამოყვეს ზაირში, ებოლას რაიონის სოფელ იამბუხუში ავადმყოფი ადამიანის სისხლისაგან. ვირიონებს გრძელი, დახვეული ძაფების ფორმა აქვთ. სიგრძე შეიძლება 1000-12000 ნმ-ს აღწევდეს, სიგანე კი მხოლოდ 80 ნმ-ს. ადამიანში იწვევენ მძიმე ინტოქსიკაციით, გამონაყარით, კანქვეშა და შინაგანი ორგანოების სისხლჩაქცევებით მიმდინარე ცხელებას . აღნიშნული დაავადებები შეყვანილია განსაკუთრებით საშიში ინფექციების რიცხვში.