ღვიძლი

საჭმლის მომნელებელი ტრაქტის ჯირკვალია. პარენქიმის სტრუქტურულ-ფუნქციური ერთეულია წილები, რომლებიც შედგებიან ნაღვლის გამომყოფი ჰეპატოციტებისაგან. ღვიძლში კარის ვენით შედის სისხლი, რომელიც მდიდარია გლიკოგენის, ცილების, ლიპიდების და სხვ. ნივთიერებების სინთეზისათვის აუცილებელი შენაერთებით. სისხლი ღვიძლიდან გადის ღვიძლის ვენის საშუალებით. ღვიძლი მონაწილეობს ცილების, ცხიმების, ნახშირწყლების, რეტინოლის, მინერალური ნივთიერებების ცვლაში. მისი ბარიერული ფუნქცია მდგომარეობს ცვლის პროდუქტების დეზინტოქსიკაციაში, მიკრობების ზრდა-განვითარების ინჰიბიციაში და სხვ. მნიშვნელოვან როლს თამაშობს ორგანიზმის ჰომეოსტაზის შენარჩუნებაში, ელენთასთან ერთად ასრულებს სისხლის დეპოს როლს, ხოლო ემბრიონულ პერიოდში მონაწილეობს ჰემოპოეზში და იმუნური პროცესების ჩამოყალიბებაში.