ქედი კასპის მუნიციპალიტეტში, თრიალეთის ქედის აღმოსავლეთი განშტოება.
სოფელი მცხეთის მუნიციპალიტეტში (დიღმის თემის საკრებულო), დიდგორის მთის სამხრეთ კალთაზე, დიღმისწყლის ხეობაში. ზღვის დონიდან – 900 მეტრი, მცხეთიდან – 23 კილომეტრი. 2002 წლის აღწერის მონაცემებით სოფელში ცხოვრობს 90 კაცი.
მთა თრიალეთის ქედის აღმოსავლეთ ნაწილში, მცხეთის მუნიციპალიტეტში, დაბა მანგლისის ჩრდილო-აღმოსავლეთით, მდინარე მტკვრის მარჯვენა შენაკადების — ვერესა და ნიჩბისისწყლის სათავეებში. აგებულია ზედა- და შუაეოცენის თიხებით, ქვიშაქვებით, ტუფბრექჩიებიტა და ტუფებით. კალთები დამრეცია, დანაწევრებულია ეროზიული ხეობებით. შემოსილია წიფლის ტყით. მწვერვალზე მეორეული სუბალპური მდელოა. ამ მიდამოებში 1121 წელს მოხდა დიდგორის ბრძოლა (სიმაღლე – 1647 მეტრი).
მთა თრიალეთის ქედის ჩრდილო-აღმოსავლეთი განშტოების, საწკეპელ-სათოვლიის ქედზე, სოფელ დიღმის ჩრდილოეთ-დასავლეთით, მცხეთის მუნიციპალიტეტში. აგებულია ზედაეოცენის დანალექი ქანებით. კალთები საშუალოდ დახრილია და შემოსილია ფოთლოვანი ტყით. ჩრდილოეთი კალთის ზემო ნაწილში განვითარებულია ბედლენდი (სიმაღლე – 1275 მეტრი).
დიდგორის ბრძოლა (ძლევაი საკვირველი) - ქართველთა მიერ გამართული ბრძოლა დავით IV აღმაშენებლის მეთაურობით თურქ-სელჯუკთა კოალიციური ლაშქრის წინააღმდეგ 1121 წლის 15 აგვისტოს დიდგორის ველზე, თბილისის მისადგომებთან.
დიდგორის რაიონი - თბილისის ერთ-ერთი რაიონი. შეიქმნა 2007 წელს. ადრე ეს ტერიტორია ექვემდებარებოდა გარდაბნის მუნიციპალიტეტს და საქართველოს პარლამენტის 2006 წლის 26 ნოემბრის დადგენილების შესაბამისად გადაეცა საქართველოს დედაქალაქის - თვითმმართველ ერთეულს. რაიონში, ძირითადად, არსებობს საკურორტო, სააგარაკე, დაბისა და სოფლის საგარეუბნო ტიპის დასახლებები. მასში შედის შემდეგი დასახლებული პუნქტები: კიკეთი, კოჯორი, ახალდაბა, ბეთანია, ტაბახმელა, შინდისი, წავკისი, წყნეთი, ოქროყანა. რაიონის ცენტრია დაბა წყნეთი.
Source: უნივერსალური ენციკლოპედიური ლექსიკონი : [3 ტომად] / შეადგინა ალექსანდრე ელერდაშვილმა. - I-ლი გამოც.. - [თბ.] : ფანტაზია, 2006. - 28სმ.[MFN: 136149]
to main page 
top of page