ხსნა

ტერმინი აღნიშნავს კაცობრიობის ხსნას ცოდვის მონობიდან, ქრისტიანული მოძღვრებისა და რწმენის თანახმად, იესო ქრისტეს მიერ, რომელიც განკაცდა და ადამიანის ნაცვლად შეეწირა მამა ღმერთს სამსხვერპლო ზვარაკად. კათოლიკე ეკლესიის კატეხიზმოს თანახმად, „ქრისტეს მთელი ცხოვრება ხსნის საიდუმლოებაა. ხსნა უმთავრესად, ჯვარზე დაღვრილი სისხლის ნაყოფია“ (CCC, 517; შდრ. ასევე, 601). სული წმიდის შეწევნით ეკლესია განაგრძობს ქრისტეს მხსნელ ქმედებას. უფრო ფართო მნიშვნელობით, ხსნის ცნება იმ კონცეფციებს მიემართება, რომლებიც სხვადასხვა რელიგიებში ბოროტების, სიკვდილის, ბედისწერისაგან ადამიანის გათავისუფლებას უკავშირდება.