სამართლიანობა

ერთ-ერთი ოთხ კარდინალურ სათნოებათაგან (კეთილგონიერება, სიმტკიცე, თავშეკავება), რომელიც მდგომარეობს „მუდმივსა და მყარ ნებაში, მიაგო კუთვნილი ღმერთსა და მოყვასს“ (CCC, 1807). ბიბლიაში ხშირადაა საუბარი სამართლიანობაზე: ფსალმუნებში (71:2; 97:9) ღმერთი წარმოდგენილია, როგორც სამართლიანად განმსჯელი, რადგან იგი ყველას თავის კუთვნილს მიაგებს; ლევიანთა წიგნში (19:15) ნათქვამია: „არა ქმნა უსამართლობა სასამართლოში, არ იყო პირმოთნე გლახაკის მიმართ და არ მიეპირფერო ძლიერს: სიმართლით განსაჯე შენი მოყვასი“. ბიბლია ბატონებს მიმართავს: „მიაგეთ მონებს, რაც სწორი და სამართლიანია“ (კოლ. 4:1) და საშინელ რისხვას აღუთქვამს მათ, ვინც მუშაკს საზღაურს დაუკავებს (იაკ. 5:4).