საიენტოლოგიის ეკლესია

1954 წელს, კალიფორნიაში ლაფაიეტ რონალდ (რონ) ჰაბარდის (1911-1986) მიერ დაარსებული ფსევდორელიგიური მოძრაობა. 1950 წელს გამოქვეყნებული ჰაბარდის წიგნი „დიანეტიკა: გონებრივი სიჯანსაღის თანამედროვე მეცნიერება“ ბესტსელერად იქცა. მოძრაობის საკვანძო ცნებაა „დიანეტიკა“ (ბერძ. diá „მიღმა“, „მეშვეობით“ + noûs „გონება“, „გონიერება“), რომელიც განმარტება როგორც „სულიერი სიჯანსაღის მეცნიერება“, რაც გონების გაძლიერებასა და აზროვნების თავისუფლების ხელშეწყობას ისახავს მიზნად. ამ მიზნებს სწავლების მიმდევარი მიაღწევს შვიდი, ერთი მეორეზე უფრო ძვირადღირებული კურსის გავლით. ამჟამად საიენტოლოგიის ეკლესია, რომელიც თავს მსოფლიო სიბრძნის საუკეთესო სკოლათა კონცენტრატს უწოდებს, დაახლოებით ოცდაათამდე ქვეყანაშია გავრცელებული და 400 000-მდე მიმდევარს ითვლის. ამ უეჭველად ფსევდორელიგიური ჯგუფის – საიენტოლოგიის ეკლესიის – ყოვლისმომცველი პროზელიტური საქმიანობა, რომელმაც მრავალი საზრუნავი გაუჩინა სასამართლოებსა და პოლიციას მთელ მსოფლიოში, ახალგაზრდა მოხალისეთა აქტიურობას ეფუძნება: სექტაში ახალი მიმდევრების მიზიდვა მოხალისეებს საშუალებას აძლევს, გადაიხადონ ეგრეთ წოდებული სულიერი გათავისუფლების კურსების საფასური.