სამრეკლო

დამოუკიდებლად მდგომი ან ეკლესიასთან გაერთიანებული კოშკის ფორმის ნაგებობა, რომელზეც მოთავსებულია ზარები და საიდანაც ისმის რეკვა (აქედან მომდინარეობს მისი სახელი). სამრეკლოს სიმაღლე ჟღერადობის უკეთ გავრცელებას უწყობს ხელს. სამრეკლო VIII-IX საუკუნეებში დამკვიდრდა, ზარების საზოგადო ხმარებასთან ერთად. იტალიაში ერთ-ერთი უძველესი სამრეკლოა მილანის წმიდა სატირის ეკლესიის სამრეკლო (IX ს.), ყველაზე დამახასიათებელი – ცილინდრული ფორმის სამრეკლოები რავენასა (კლასეს წმიდა აპოლინარიუსისა და ახალი წმიდა აპოლინარიუსის ტაძრები) და პიზაში (წრიული გეგმის მქონე გადახრილი სამრეკლო სართულებად განლაგებული ლოჯიებით), აგრეთვე, ტაძრის შენობისგან გამოყოფილი წმიდა მარკოზის ტაძრის სამრეკლო ვენეციაში.