რასიზმი

განსჯით და პრაქტიკულ მიმართულებათა თუ ხედვათა ერთობლიობა, რომლებიც რასებს უმაღლესთა და უმდაბლესთა კატეგორიებად დაყოფს და ქადაგებს ან ემხრობა დისკრიმინაციას სოციალურ, იურიდიულ და ინსტიტუციურ სფეროებში, რამაც დევნისა და მასობრივი განადგურების სახეც კი შეიძლება მიიღოს. თეორიულად რასიზმი უმთავრესად XIX საუკუნის მეორე ნახევარში ჩამოყალიბდა, ხოლო პოლიტიკური თუ, ზოგადად, პრაქტიკული გამოყენება XX საუკუნის დასაწყისში ჰპოვა (ნაციზმი, ფაშიზმი, ზანგთა რასობრივი ჩაგვრა ამერიკის შეერთებულ შტატებში, აპარტეიდი სამხრეთ აფრიკაში). ქრისტიანული თვალსაზრისით, ყველა ადამიანი თანაბარი ღირსების მატარებელია, რადგან ერთადერთი ღმრთის ხატებადაა შექმნილი და ერთსა და იმავე რაციონალურ სულს ფლობს. აქედან გამომდინარე, „ყოველგვარი დისკრიმინაცია... სექსუალური, რასობრივი, კანის ფერის, სოციალური, ენობრივი თუ რელიგიური ნიშნით უნდა იქნას დაძლეული და აღმოფხვრილი, როგორც ღმრთის ჩანაფიქრის საწინააღმდეგო“ (GS, 29; შდრ. CCC, 1934-1938).