ტანტრიზმი

ერთ-ერთი ძირითადი მიმდინარეობა ინდურ რელიგიათა შორის. დიდი გავლენა იქონია ინდოეთის ყველა ფილოსოფიური სისტემისა და რელიგიური კულტის ჩამოყალიბებაზე. ამკვიდრებს რეალობის „საკრამენტულ“ ხედვას: ყოველი ნივთიერი, მშვინვიერი და სულიერი ფენომენი იქცევა ღმრთაებრივი რეალობის სიმბოლოდ და, მაშასადამე, ხსნის საშუალებად, რომლის წვდომაც რიტუალებისა და იოგას საშუალებითაა შესაძლებელი. ჰინდუიზმში ტანტრიზმი ეყრდნობა ტანტრას წმიდა ტექსტებს და შაქტის, დინამიკური ქალური ენერგეტიკული საწყისის, კულტს. შაქტი მეუღლეა შივასი, რომელიც განასახიერებს მამაკაცურ სულიერ სტატიკურ საწყისს, საიდანაც მომდინარეობს რეალობის, როგორც აბსოლუტური არსებულის, აღქმა. ბუდჰიზმში კი ტანტრიზმი, როგორც აბსოლუტური საწყისი, არსებობის სიცარიელეს სთავაზობს მორწმუნეს და უბიძგებს მას, სიყვარულითა და თავდადებით დაეხმაროს ყველა ცოცხალ არსებას გათავისუფლებისაკენ მიმავალ გზაზე.