შვეიცარიული გვარდია

შვეიცარიელ ჯარისკაცთა ნაწილი, რომელიც ვატიკანის სახელმწიფოს ემსახურება და რომელსაც პაპის დაცვა, სამოციქულო სასახლისა და ვატიკანის გარე შესასვლელთა კონტროლი ევალება. XIV საუკუნიდან წმიდა საყდრის სამსახურში მრავალი შვეიცარიელი იყო, მუდმივმოქმედი და ჩამოყალიბებული შენაერთის შექმნის იდეა კი პაპ გვიდო II-ს ეკუთვნის. 1506 წლის 21 იანვარს პაპმა პირველი 150 შვეიცარიელი ჯარისკაცი აკურთხა, რომლებმაც ვატიკანში დაიწყეს სამსახური. 1976 წელს დამტკიცებული რეგლამენტით პავლე VI-მ შენაერთის 90-კაციანი შემადგენლობა დაამკვიდრა: 4 ოფიცერი, 1 კაპელანი, 23 უნტერ-ოფიცერი, 60 შუბნაჯახით შეიარაღებული ჯარისკაცი და 2 მედოლე. 1979 წელს იოანე პავლე II-მ შუბნაჯახის მტვირთავთ რაოდენობა 70-მდე გაზარდა, რის შედეგადაც შვეიცარიული გვარდიის შემადგენლობა 100 კაცს ითვლის. შვეიცარიული გვარდიის ჯარისკაცები დღემდე ატარებენ განსაკუთრებულ სამოსელს, რომლის ავტორადაც მიქელანჯელოა მიჩნეული.