ქვიშილეთი

ციხე (ქც 4: 761,25, სქ. 4).

იხსენიება შემდეგ წერილობით წყაროებში: ვახუშტი ბაგრატიონის „აღწერა სამეფოსა საქართველოსა“ (ქც 4: 761,25,სქ.4), იოჰან გიულდენშტედტის „მოგზაურობა საქართველოში“ (გიულდენშტედტი 1962: 305).

ვახუშტი ბაგრატიონი ქვიშილეთის ციხის შესახებ გადმოგვცემს: „ქუთათისის ჩდილოთ და რიონის დასავლით არს ქვიშილეთს ციხე ფრიად მაგარი“ (ქც 4: 761,24,25).

სავარაუდოდ ლოკალიზდება წყალტუბოს მუნიც-ის სოფელ ქვილიშორის ტერიტორიაზე, ქვილიშორის მღვიმესთან.

იოჰან გიულდენშტედტი „მხარე სალორთქიფანიძოს“ სოფლების ჩამონათვალში ასახელებს სოფ. ქვილიშას (გიულდენშტედტი 1962: 305). ნ.ბერძენიშვილის აღნიშვნით, ტოპონიმი ქვიშილეთი შესაძლოა შეცვალა ქვილიშორმა. ქვილიშორში მოსახლეობა ციხის არსებობას მიუთითებს ქვილიშორის გამოქვაბულთან ახლოს, სადაც ნანგრევებია შემორჩენილი (ბერძენიშვილი 1990: 355).

სოფ. ქვიშილეთ-ქვილიშორი და ციხის ტერიტორია არქეოლოგიურად შეუსწავლელია.