ყაჯართა დინასტიის წარმომადგენელი. გენერალი. 1894 იმოგზაურა კავკასიაში. თხზ-ში „მოგზაურობა“ თავისი შთაბეჭდილების აღწერისას ვრცლად ეხება თბილისს: „თბილისი მთელი კავკასიისა და საქართველოს საგუბერნიო ცენტრია. მასზე გადის ბათუმ-ბაქოს რკინიგზა, მდ. მტკვრის ორსავე მხარეზეა გაშენებული ერთი ფარსანგის (6-7 კმ) მანძილზე. ქალაქის შუაში რამდენიმე ბულვარია, სადაც სახელმწიფო დაწესებულებათა უმრავლესობაა, სამხედრო და ქალაქის მუზეუმები, სასტუმროები („ლონდონი“, „კავკასია“, „ვერსალი“, „გრანდ-ოტელი“), ეკლესიები, თეატრები, ცირკი, საზოგადოებრივი კლუბები. ბულვარზე ლამპიონებია. ავტორი იხსენიებს ტელეფონს, ტრამვაის (ყველა ცნობილ ქუჩაზე ტრამვაის ხაზია), ეტლებს (3000 გასაქირავებელი ეტლია), ველოსიპედს; ეტლებისა და კარეტების დამამზადებელ ფაბრიკებს, რ-თა ნაწარმი ირანშიც გააქვთ, ჯარის სადგომებს, ჯარს, მათ ტანსაცმელს, სათესი მანქანების დამამზადებელ ქარხნებს, სამკურნალო დაწესებულებებს, აბანოებს (ორბელიანის აბანო), აფთიაქებს, ზუსტი ხელსაწყოების მაღაზიებს; აგვიწერს ქრისტიანულ დღესასწაულებს (ნათლისღება), ქალთა ზნე-ჩვეულებებს, ტანსაცმელს, ქორწილს. მოგვითხრობს მთაწმინდის კალთაზე შეიხ სენანის აკლდამის მითის თაობაზე.
თხზ: ქალაქ თბილისის აღწერა, ტექსტი გამოსაცემად მოამზადა, თარგმნა და კომენტარები დაურთო მაია მამაცაშვილმა, თბ., 1971.