მიქელ პანარეტოსი

ბიზანტიელი მწერალი XIV-XV სს. თავის „ტრაპიზონის ქრონიკაში“ მოგვითხრობს ტრაპიზონის მეფის იოანე-ალექსი III-ის და საქართვ. მეფის დავით IX-ის საქორწინო შეთანხმებაზე... აქ იგი საქართველოს მეფეს უწოდებს „ტიფლისის მეფეს“. უფრო ქვემოთ, თემურლენგის საქართველოში ლაშქრობისა და ბაგრატ V-ის შეპყრობის ამბავთან ერთად მ. პ. აღწერს თბილისს. იგი აღნიშნავს, რომ თემურლენგმა ხელთ იგდო „საოცარი ტიფლისი“, შემდეგ კი უმატებს: „ვინ მოთვლის რა ქონება იგდო ხელთ, რა ხატები გაძარცვა და დაწვა, რამდენი თვალი პატიოსანი, მარგალიტი, ოქრო და ვერცხლი წაიღო“. ეს მინიშნებაა ქალაქის სიმდიდრეზე. თანაც აქვე მოცემულია თბილისის აღების ზუსტი თარიღი − 1387 წ. 21 ნოემბერი. ნ. ლომოური.