ქსოვილი სახიანი

ფერადი ნართით ნაქსოვი და ნაირფრად შეღებილი ბამბის, შალის, აბრეშუმისა და სელის ფეიქრული ნაწარმი. მათ განეკუთვნება ზოლიანი (ქართლ-კახ.), ღვედიანი (ლეჩხუმი), ფორჩხებიანი (გურია).უჯრებიანი, ჭადრაკული, კუბოკრული, ფუთური (იმერ.), დოლაბდოლაბი (სამცხეჯავახ.), ფოტური (გურ.), კუპლეტებიანი (ლეჩხ.), ნახჭიანი (რაჭ.) ქსოვილები. სახიანი ქსოვილებიდან საქართველოს მთიან ნაწილში მზადდებოდა ფარდაგ-ფიჩვი, ხალიჩა, ჯეჯიმი. ბარის ზონის რეგიონებში იქსოვებოდა ზოლიანი, უჯრებიანი-კუბოკრული დაჩითული ბამბის, აბრეშუმის, სელის სახიანი ქსოვილები. ისინი მოიხმარებოდა ლოგინის (ლეიბი, საბანი, ბალიში) გადასამოსავად, ფარდებად, არტახებისათვის, სარტყლებად, წინსაფრებად, ქალის კაბის მასალად და სხვა. სახიან ქსოვილებში სხვადასხვა ფერის ნართი - საქსელი და მისაქსელი, გარკვეულ ფერთა მონაცვლეობით იყო განლაგებული.
ლიტ.: გ. ჩაჩაშვილი, საქართველოს მუზეუმის საჩითავები, 1962. მსშხი, ტ. II, ნაწ. II, 1982.
ლ.მ.