გარჯილა და გაურჯელა

გარჯილა-ს მშრომელ, მუყაით ადამიანს ეძახიან, მაგალითად: გარჯილა ბებია. გარჯილა გარჯილის, კნინობითია. გაურჯელს კი თავისი კნინობითი აქვს: გაურჯელა.

გაურჯელას სახელდახელოდ „თათარიახნად“ ჩაყაურმებულ თუ ჩახრაკულ საქონლის შიგნეულს ეძახიან. „დიდი ჯაფა არც გაკეთებას უნდა, არც ჭამას“, ეს სახელი იმიტომ ჰქვიაო. ქიწნურა ვაზს შეწამვლა და ლოლიაობა არ სჭირდება, ამის გამო მასაც „გაურჯელა“ შერქმევია.

„გაურჯელა“ კოჭობანას ტერმინადაც ქცეულა: მარჯვე მოთამაშე ერთი მორტყმით რომ მოიგებს და წამოხვეტავს.