კომპოზიტური მიმართულება ურბანსოციოლოგიაში

მისი წარმომადგენელია სოციოლოგი ჰერბერტ განსი (XX ს–ის 60–იანი წლები) და ფიშერი, რომელიც აღიარებს ცხოვრების სტილთა სიმრავლეს ქალაქის ფარგლებში. ამერიკელმა სოციოლოგმა განსმა (XX საუკუნის 60-იანი წლები) თავისი კვლევა მიუძღვნა ინდივიდის ადაპტაციას ქალაქის სივრცესთან. მან გამოყო ადაპტაციის ძირითადი კატეგორიები, რომლებიც კონკრეტული ჯგუფების მიერ ქალაქთან ადაპტაციის კონკრეტულ მიზეზებს ეფუძნება. მაგალითად: კოსმოპოლიტები - ძირითადად სტუდენტები, ხელოვანების დარგის წარმომადგენლები, ინტელექტუალები და სხვა პროფესიონალები, რომლებიც ქალაქში ცხოვრებას ირჩევენ კულტურულ ფასეულობათა გამო; ან დაუოჯახებელი ადამიანები, რომლებიც ქალაქში ცხოვრებისაკენ მიილტვიან გასართობის მრავალფეროვნების გამო, ისევე როგორც სამუშაოს არსებობის გამო; თუნდაც ეთნიკური ჯგუფის წარმომადგენლები, რომლებიც ქალაქში ერთიანდებიან თავისივე ეთნიკური ჯგუფის წარმომადგენლებთან ტერიტორიული ერთობისა და სიახლოვის პრინციპით და ქალაქს უყურებენ როგორც თავისი უბნის გარეთ განლაგებულ სხეულს. განსის თეორიის მიხედვით ურბანიზმი არ არის ერთმნიშვნელოვანი, არამედ მოიცავს მრავალი განსხვავებული სტილის ერთობლიობას. ყველა ზემოთ აღნიშნული ჯგუფისათვის ქალაქის სხვადასხვა მახასიათებლებია მნიშვნელოვანი და თითოეულ შემთხვევაში ქალაქური თემის ფორმირებას სხვადასხვა განმაპირობებელი ფაქტორები უდგას უკან. განსმა აგრეთვე გაუსვა ხაზი სოციალური კლასის და ასაკის მნიშვნელობას ურბნული თუ რურალური ცხოვრების სტილის და ქცევის ჩამოყალიბებაში.