ბალთაზარი ჰანს ურს ფონ (1905-1986)

Ханс Урс фон Бальтазар (Balthasar). დღევანდელი კათოლიკური თეოლოგიის ერთ-ერთი ყველაზე გავლენიანი წარმომადგენელი, მომხრეა „განვითარებადი თეოლოგიისა“, რომელიც ემყარება წინაპირობას, რომ გამოცხადება ამოუწურავი საბადოა და მისი ამოწურვის პრეტენზია არც ერთ თეოლოგიურ სინთეზს არ უნდა ჰქონდეს. ყოველ თაობას აქვს უფლება და მოვალეობაც, ხელახლა გაიაზროს გამოცხადება და მიიღოს მისი ნაყოფი იმ კონკრეტულ ისტორიულ ვითარებაში, რომელშიც ცხოვრობს. აქედან მომდინარეობს ბალთაზარის ცნობილი თეზისი: „ქრისტიანული ცხოვრების ჭეშმარიტება უდაბნოში მოვლინებული მანანას მსგავსია: არ შეიძლება მისი გადადება და შენახვა, დღეს ის ახალია, ხვალ კი დაობდება. ჭეშმარიტება, რომელიც მხოლოდ გადაეცემა და ძირეულად აღარ გაიაზრება, კარგავს თავის სასიცოცხლო ძალას. ჭურჭელი, რომელიც მას იტევს (მაგალითად, ენა, ხატებათა და ცნებათა სამყარო), მტვერიანდება, იჟანგება, ნამცეცდება. ძველი მხოლოდ მაშინ რჩება ახლად, თუ სულ უფრო ახალგაზრდული ძალით მიემართება უძველესსა და მუდამ აქტუალურს, ღმერთის გამოცხადებას“.