ადამიანის უფლებათა ამერიკული კონვენციის დამატებითი ოქმი ეკონომიკურ, სოციალურ და კულტურულ უფლებათა სფეროში, 1988 – ოქმის პრეამბულაში ხაზგასმითაა აღნიშნული უფლებათა ორი ჯგუფის განუყოფლობა. მიუხედავად ამისა, სახელმწიფოთა უმრავლესობამ არ ისურვა მათი რატიფიცირება და ოქმი ძალაში მხოლოდ 1999 წელს შევიდა. მას ახლაც გაცილებით ნაკლები ხელმომწერი მხარე ჰყავს, ვიდრე კონვენციას. ოქმში მოყვანილი უფლებები უმთავრესად აღწერს საერთაშორისო პაქტში ხსენებულ ეკონომიკურ, სოციალურ და კულტურულ უფლებებს. აშკარაა კავშირი სახელმწიფოებზე დაკისრებულ ვალდებულებათა თვალსაზრისით –„აუცილებელი ზომების მიღება, როგორც დემოკრატიული, ასევე საერთაშორისო თანამშრომლობის გზით, განსაკუთრებით ეკონომიკური და ტექნიკური დახმარებით, გაფართოვება ხელმისაწვდომი რესურსების საფუძველზე, მათი განვითარების დონის გათვალისწინებით, წინამდებარე ოქმში აღიარებულ უფლებათა სრული დაცვის მიზნით შესაბამისი კანონმდებლობის თანახმად” (მუხლი 1). შემდეგ, სახელმწიფოებს ეკისრება შესაბამისი კანონმდებლობის მიღება მათი იურისდიქციით გათვალისწინებულ უფლებათა განხორციელების მიზნით (მუხლი 2). ოქმში მოყვანილი უფლებები ძირითადად ეხება მუშაობასთან, სოციალურ უზრუნველყოფასთან, ჯანმრთელობასთან, ჯანმრთელ გარემოსთან, საკვებთან, განათლებასთან, კულტურასთან, ოჯახის დაცვასა და პროფკავშირთან დაკავშირებულ უფლებებს. განსაკუთრებული დაცვის მიზნით საზოგადოების დაუცველი ჯგუფები, კერძოდ, ბავშვები, მოხუცები და ინვალიდები ცალკეა გამოყოფილი.
Source: სმიტი რონა კ. ადამიანის საერთაშორისო უფლებები: სახელმღვანელო. [მეორე გამოცემა]–რედ. გიორგი ჯოხაძე თარგმანი: მანანა კობიაშვილი,–ოქსფორდის უნივერსიტეტის გამომცემლობა, – „სეზანი“.