გამგეობა

ადგილობრივი მმართველობის ორგანო. საქართველოს კანონმდებლობით, სოფლის, თემის, დაბის, ქალაქის და რაიონის საკრებულოს აღმასრულებელი ორგანო. იმ სოფელსა და თემში, რომელთა მოსახლეობის რაოდენობა სამი ათას კაცს არ აღემატება, გამგეობა არ იქმნება და მის ფუნქციას უშუალოდ გამგებელი ახორციელებს. გამგეობა უზრუნველყოფს საკრებულოსა და გამგებლის მიერ მიღებულ გადაწყვეტილებათა შესრულებას, შეიმუშავებს ბიუჯეტის პროექტს, უზრუნველყოფს დამტკიცებული ბიუჯეტის შესრულებას, ახორციელებს კანონით მინიჭებულ სხვა უფლებამოსილებას (საქართველოს ორგანული კანონი „ადგილობრივი თვითმმართველობისა და მმართველობის შესახებ“, მუხლი 9-10, 23)