ეპისკოპოსი

(მღვდელმთავარი) ქრისტიანულ ეკლესიაში დადგენილი მღვდელმსახურთა სამი ხარისხიდან (ეპისკოპოსი, პრესვიტერი, დიაკონი) უმაღლესი სასულიერო ხარისხი, რომელიც როგორც წესი ენიჭება საეკლესიო ადმინისტრაციული ერთეულის (ეპარქიის) მმართველს (ირჩევენ არქიმანდრიტთა შორის განსაკუთრებულად გამორჩეულთ). მას მღვდლისგან განსხვავებით, შეუძლია აღასრულოს არა მხოლოდ ღვთისმსახურება, არამედ ხელი დაასხას მღვდლად (ქიროტონია), აკურთხოს მირონი, ანუ შეასრულოს შვიდივე საიდუმლო (ნათლისღება, მირონცხება, ზიარება, სინანული, ზეთის კურთხევა, ქორწინება, მღვდლობა). სიწმინდის ხარისხით ყველა მღვდელმთავარი თანასწორია, დამსახურებულ მღვდელმთავარს ენიჭება მთავარეპისკოპოსის ხარისხი, მასზე აღმატებულია მიტროპოლიტი (საბერძნეთის მართლმადიდებელ ეკლესიაში მთავარეპისკოპოსი მიტროპოლიტზე აღმატებულია).