იესო ქრისტე მაცხოვარი

აღთქმული მესია, უფალი იესო ქრისტე ნაწინასწარმეტყველებ დროს (დაბ. XLIX, 10), 25 დეკემბერს მოევლინა ქვეყანას, იუდეის ბეთლემში, რათა ადამიანის ცოდვები გამოესყიდა. უფალი იესო ქრისტე არის თვითმყოფადი, მარადიული, ყველგანმყოფი, უცვლელი და მეორე სახეა წმინდა სამების. ჭეშმარიტი ღმერთი იესო ქრისტე არის აგრეთვე ჭეშმარიტი ადამიანიც, რომელიც სულიწმიდისა და ყოვლადწმინდა ღვთისმშობელ, ქალწულ მარიამის საშუალებით განკაცდა - ანუ ძე ღვთისამ მიიღო ადამიანის ხორციელი ბუნება, გარდა ცოდვისა. იესო ქრისტე მაცხოვარი ევნო, დაეფლა (მიიღო სიკვდილი), აღდგა მკვდრეთით (იხ. უფლისა ჩვენისა იესო ქრისტეს ბრწყინვალე აღდგომის დღე) და ამაღლდა ზეცად „და მჯდომარე არს მარჯვენით მამისა და კუალად მომავალ არს დიდებით განსჯად ცხოველთა და მკუდართა, რომლისა სუფევისა არ არს დასასრულ“.