სახელმწიფო დროშა

სახელმწიფოს ერთ-ერთ ოფიციალური სიმბოლო, მისი სუვერენიტეტის გამოხატულება. საქართველოს სახელმწიფო დროშა არის მართკუთხა თეთრი ფერის ქსოვილი, რომლის ცენტრალურ ნაწილში გამოსახულია დროშის ოთხივე გვერდთან დაკავშირებული სწორკუთხა წითელი ფერის დიდი ჯვარი; ჯვრის ვერტიკალურჰორიზონტალური მკლავებით გამოყოფილ ოთხკუთხედებში გამოსახულია ოთხი იმავე ფერის, ბოლნურ-კაცხური ჯვარი. საქართველოს სახელმწიფო დროშა მუდმივად აღიმართება საქართველოს პრეზიდენტის რეზიდენციის, პარლამენტის, აღმასრულებელი ხელისუფლების დაწესებულებების, საკონსტიტუციო და უზენაესი სასამართლოების, აფხაზეთისა და აჭარის ავტონომიური რესპუბლიკების უმაღლესი წარმომადგენლობითი და აღმასრულებელი დაწესებულებების, ადგილობრივი თვითმმართველობისა და მმართველობის ორგანოების, სხვა სახელმწიფო, ადმინისტრაციული ორგანოების შენობებზე, აგრეთვე, საზღვარგარეთ არსებული საქართველოს საელჩოებისა და სხვა დიპლომატიური წარმომადგენლობების შენობებზე, საზღვაო გემებსა და საზღვაო მიმოსვლის სხვა საშუალებებზე, რომელთა მიწერის ადგილი საქართველოს ტერიტორიაა (საქართველოს ორგანული კანონი სახელმწიფო დროშის შესახებ, 2004 წლის 14 იანვარი, საქართველოს პრეზიდენტის 2004 წლის 25 იანვარს №31 ბრძანებულება საქართველოს სახელმწიფო დროშის სტანდარტული ზომებისა და ზუსტი გამოსახულების დადგენის შესახებ).