დენუდაციის ბაზისი

დონე, რომელიც შეეფარდება ფერდობის პროფილის გარდატეხას და ჰყოფს მას უფრო ციცაბო და დამრეცი დაქანების უბნებად (ამ უკანასკნელთან წყდება მასის მოძრაობა ფერდობზე). დენუდაციის ბაზისის მიმართ ხდება მასის სიბრტყითი დაშლა-გადაადგილება გრავიტაციული ძალებით, რომლის ინტენსიურობა განისაზღვრება ფერდობის დაქანებით, არჩევენ: 1. ადგილობრივი დენუდაციის ბაზისს, რომელიც ჰყოფს ფერდობის სხვადასხვა უბნებს, საიდანაც მასის ჩამოტანა დამოკიდებულია მათ სხვადასხვა დონეზე; 2. დენუდაციის საერთო ბაზისს, რომელიც დაკავშირებულია მდინარის ან წყლის აუზის დონესთან, ანუ იმ ადგილთან, სადაც წყდება გრავიტაციული გადაადგილება და შესატყვისად სიბრტყებრივი გარეცხვაც; 3. მოცემულ ადგილზე დენუდაციური პროცესების გამოვლინების შესაძლო ქვედა ზღვარი; მთის ძირი, ნაკადის ან წყალსატევის დონე სადამდეც შესაძლებელია ფერდობიდან გადარეცხილი, ან გამოფიტული მასალის გადაადგილება.