ორგანიზმთა განაწილების ხასიათი პოპულაციაში

პოპულაციის ნორმალური არსებობა დაკავშირებულია იმ ტერიტორიასთან, რომელშიც იგი ბინადრობს. როგორი ვრცელიც არ უნდა იყოს ეს ტერიტორია, მისი სასიცოცხლო რესურსები მაინც შეზღუდულია; აქ შეიძლება იარსებოს ორგანიზმთა მხოლოდ განსაზღვრულმა რაოდენობამ. გასაგებია, რომ არსებული რესურსების გამოყენების სისრულე დამოკიდებულია არა მხოლოდ პოპულაციის რიცხოვნობაზე, არამედ იმაზეც, თუ როგორ არიან განაწილებული ორგანიზმები ტერიტორიის ფარგლებში. სახეობის სპეციფიკისა და ტერიტორიის ფიზიკურ - გეოგრაფიული თავისებურების შესაბამისად არჩევენ ორგანიზმთა სივრცობრივი განაწილების ანუ შიგა პოპულაციური დისპერსიის სამ ძირითად ტიპს - შემთხვევითს, თანაბარსა და ჯგუფურს.