კოჰორტა

ადამიანთა ერთობლიობა, რომლებმაც ერთი და იმავე პერიოდში განიცადეს გარკვეული დემოგრაფიული შემთხვევა (მაგ. ადამიანთა ჯგუფი, რომელიც დაქორწინდა რომელიმე ერთ წელს; ქალების ჯგუფი, რომელმაც გააჩინა პირველი ბავშვი რომელიმე ერთ წელს და სხვა). ადამიანთა ჯგუფი, რომელიც დაიბადა რომელიმე კალენდარულ პერიოდში. აგრეთვე ცნობილია თაობის სახელწოდებით. კოჰორტის გამოსაყოფი დროის ინტერვალი (ერთი ან რამდენიმე წელი) დამოკიდებულია ანალიზის მიზნებზე და მასალის თავისებურებებზე.

ტერმინი „კოჰორტა“ 1947 წელს შემოიღო ამერიკელმა დემოგრაფმა პასკალ უელპტონმა. პირველად კოჰორტა გამოიყენებოდა სიგრძივი ანალიზისას, თუმცა შემდგომში მიიღო უნივერსალური ხასიათი. თანამედროვე დემოგრაფიაში განასხვავებენ რეალურ კოჰორტას (სიგრძივი ანალიზის ობიექტი) და ჰიპოთეზურ კოჰორტას (განივი ანალიზის ობიექტი.

რეალურ კოჰორტაში ყველა შემთხვევა, რომელთა მოხდენა აერთიანებს ადამიანებს კოჰორტაში, წარმოებს კალენდარული დროის გარკვეულ ინტერვალში, ხოლო შემდგომი შესაძლებელი შემთხვევები, რომელთა სიხშირე იზომება, გაგრძელებულია მომავალ დროში კოჰორტის ფორმირების კალენდარული პერიოდის მიმართ.

ჰიპოთეზურ კოჰორტაში ყველა შემთხვევა, რომელთა სიხშირე იზომება, წარმოებს კალენდარული დროის გარკვეულ ინტერვალში, რომელიც ითვლება ჰიპოთეზური კოჰორტის ფორმირების პერიოდად, ხოლო წინამავალი შემთხვევები გაგრძელებულია წარსულ დროში ამ პერიოდის მიმართ.

დემოგრაფიული პროცესის ანალიზი კოჰორტაში ეფუძნება ამა თუ იმ დემოგრაფიული შემთხვევის დადგომის სიხშირის გაზომვას დროის ინტერვალთან დამოკიდებულებაში, რომელიც გავიდა წინა შემთხვევის დადგომის მომენტიდან.