დემოგრაფიული ინფორმაციის წყაროები

ბეჭდვითი გამოცემები, რომლებიც შეიცავენ რიცხობრივ მონაცემებს მოსახლეობისა და დემოგრაფიული პროცესების შესახებ.

დემოგრაფიული ინფორმაციის წყაროები განსხვავდება:

• მოცვის ხარისხის მიხედვით (მსოფლიოს, რეგიონის, ქვეყნის ან მისი ცალკეული ნაწილის, დასახლებული პუნქტის მოსახლეობა);

• ეროვნული მიკუთვნებულობის მიხედვით (ეროვნული და საერთაშორისო);

• მონაცემთა ხასიათის მიხედვით (მოსახლეობის რაოდენობა და შემადგენლობა, დემოგრაფიული პროცესების დინამიკა);

• დროთი, რომელსაც მიეკუთვნება მონაცემები (ისტორიული, რეტროსპექტული, მიმდინარე, პროგნოზი);

• მონაცემთა მიღების საშუალების მიხედვით (ოფიციალური, სპეციალური გამოკვლევის მონაცემები);

• გამოცემის ხასიათის მიხედვით (სპეციალური, ზოგადი ტიპის).

დემოგრაფიული ინფორმაციის წყაროები იყოფა პირველადად და მეორადად. პირველადს განეკუთვნება მოპოვებული სტატისტიკური მონაცემების დამუშავებისა და შეპირისპირების უშუალო შედეგები და მათ საფუძველზე გაანგარიშებული მაჩვენებლები. მეორადს – პირველადი მონაცემების შეფასებისა და მათი მეშვეობით ჩატარებული სხვადასხვა სახის გაანგარიშებათა შედეგები.