მოსახლეობის გლობალური პრობლემები

თანამედროვეობის დემოგრაფიულ პრობლემათა ერთობლიობა, რომელიც ეხება მთელი კაცობრიობის ინტერესებს და რომელთა გადაწყვეტაზე დამოკიდებულია თანამედროვე ეპოქის შემდგომი სოციალური პროგრესი. მოსახლეობის გლობალური პრობლემების რიცხვს ეკუთვნის მოსახლეობის სწრაფი მატება განვითარებად ქვეყნებში და დეპოპულაციის საშიშროება განვითარებულ ქვეყნებში. არაკონტროლირებადი ურბანიზაცია განვითარებად ქვეყნებში და მსხვილი ქალაქების კრიზისი განვითარებულ ქვეყნებში, სტიქიური მიგრაცია, განსაკუთრებით გარე, რომელსაც ზოგჯერ მოსდევს პოლიტიკური ურთიერთობის გამწვავება რიგ ქვეყნებს შორის და სხვა. მოსახლეობის გლობალური პრობლემები ან გამწვავებული თანამედროვე მსოფლიო დემოგრაფიული ვითარება შეადგენენ გლობალური პრობლემების განუყოფელ, ორგანულ ნაწილს. ტერმინი „გლობალური პრობლემები“ შემოტანილ იქნა მეცნიერულ ლიტერატურაში XX ს. 60-იანი წწ. ბოლოს და 70-იანი წწ. დასაწყისში „რომის კლუბის“ მეცნიერთა ნაშრომებიდან.