ნაწარმოების გამოყენების განსაკუთრებული უფლება

ნაწარმოების ავტორის ან საავტორო უფლებათა სხვა მფლობელის უფლება ნება დართოს ან აკრძალოს შემდეგ მოქმედებათა განხორციელება:

ნაწარმოების კვლავწარმოების (რეპროდუცირების) უფლება; ნაწარმოების გავრცელების უფლება; უფლება იმპორტზე; საჯარო ჩვენების, შესრულებისა და საჯარო გადაცემის უფლება; კაბელით გადაცემის უფლება; თარგმნის უფლება; გადამუშავების უფლება (ადაპტაცია, არანჟირება და ა. შ.).

ზოგიერთ ნაწარმოების ავტორებსა და საავტორო უფლებათა სხვა მფლობელებს ეკუთვნით აგრეთვე გაქირავებით გავრცელების უფლება; არქიტექტურული, ქალაქმშენებლობისა და საბაღე-საპარკე პროექტების გამოყენების განსაკუთრებული უფლება მოიცავს ასეთ პროექტთა პრაქტიკული რეალიზაციის უფლებას. თუ მართლზომიერად გამოქვეყნებული ნაწარმოების ეგზემპლარები იყიდება, მაშინ დაიშვება მათი შემდგომი გავრცელებაც ავტორის ნებართვისა და საავტორო ჰონორარის გადახდის გარეშე.